अनधिकृत होर्डिंग्ज लावणार्‍या जाहिरात एजन्सी विरूध्द कायदेशीर कारवाई – आयुक्त डॉ. पंकज जावळे

TIMES OF AHMEDNAGAR

अहमदनगर- गेल्या काही दिवसांत केवळ नऊ होर्डिंग्जवर कारवाई करण्यात आली आहे. सर्वेक्षणात आढळलेल्या ८३ अनधिकृत होर्डिंग्जबाबत तात्काळ पडताळणी करून २५ जूनपर्यंत ते काढून घ्यावेत. सर्व अनधिकृत होर्डिंग्जवर तत्काळ गुन्हे दाखल करावेत. असे आदेश आयुक्त डॉ. पंकज जावळे यांनी दिले आहेत. अतिरिक्त आयुक्त सौरभ जोशी यांच्या मार्गदर्शनाखाली शहरात अनधिकृत होर्डिंग्जवर कारवाई सुरू आहे. आयुक्त जावळे यांनी या कारवाईचा आढावा घेतला आहे. शहरात ३८४ अधिकृत होर्डिंग्ज असून या सर्वांचे स्ट्रक्चरल ऑडिट दोन दिवसांत पूर्ण करा.

स्त्रोत सोशल मिडिया 

महानगरपालिका अनधिकृत होर्डिंग्जवर गुन्हे दाखल करणार…

अनधिकृत आढळलेल्या ८३ होर्डिंग्जपैकी ज्यांच्या परवान्याचे अर्ज प्रलंबित आहेत ते १४ जूनपर्यंत निकाली काढावेत. ज्याची परवानगी देता येणार नाही ते अर्ज नामंजूर करा. त्यानंतर उर्वरित अनधिकृत होर्डिंग्जवर गुन्हे दाखल करावेत. सध्या सुरू असलेली कारवाई अत्यंत संथगतीने सुरू आहे. त्याला गती द्यावी. कोणत्याही परिस्थितीत २५ जूनअखेर सर्व अनधिकृत होर्डिंग्ज काढून घ्यावेत. असे आदेश आयुक्त जावळे यांनी दिले आहेत. होर्डिंग्ज परवाना नुतनीकरणाचे तसेच नवीन होर्डिंग्जसाठीचे अर्ज प्रलंबित ठेवणे, अनधिकृत होर्डिंग्ज हटवण्याच्या कारवाईवेळी नुतनीकरण व परवानगीसाठी आलेल्या अर्जाची माहिती उपलब्ध करून न देणे, अनधिकृत होर्डिंग्ज लावणार्‍या जाहिरात एजन्सी विरूध्द कायदेशीर कारवाई न केल्याने प्रशासक जावळे यांनी जाहिरात विभाग प्रमुख सुबोध देशमुख यांना कारवाईची नोटीस बजावली आहे.

स्त्रोत सोशल मिडिया 

नगर-मनमाड रस्त्यावरील अनधिकृत होर्डिंग्ज प्रकरणी तोफखाना पोलीस ठाण्यात फिर्याद.

शहरातील अनधिकृत मोबाईल टॉवरचे सर्वेक्षण महापालिकेकडून सुरू करण्यात आले आहे. सर्वेक्षणात उभ्या असलेल्या टॉवर संदर्भात नगररचना विभागाकडून माहिती मागविण्यात आली आहे. तसेच शहरातील अनधिकृत व मुदत संपलेल्या गॅन्ट्री काढण्याच्या सूचनाही देण्यात आल्या आहेत. याबाबतही लवकरच कारवाई सुरू होईल असे अतिरिक्त आयुक्त जोशी यांनी सांगितले आहे. नगर-मनमाड रस्त्यावरील एका अनधिकृत होर्डिंग्ज प्रकरणी महापालिकेने तोफखाना पोलीस ठाण्यात फिर्याद दिली आहे. जाहिरात विभागाचे सुबोध विनायक देशमुख यांनी दिलेल्या फिर्यादीवरून अज्ञात व्यक्तीविरूध्द हा गुन्हा दाखल करण्यात आला आहे. ७ जून रोजी रात्री महापालिकेने हे होर्डिंग्ज कारवाई करून हटवले होते. या प्रकरणी काल गुन्हा दाखल करण्यात आला आहे.