बाळासाहेब थोरातांच्या कन्येवर टीका करण्याऱ्या वसंत देशमुखांना जामीन मंजूर, २४ तासात सुटका.

(संग्रहित दृश्य.)

वसंत देशमुख यांची अटकेपूर्वी तब्येत बिघडल्याने…

धांदरफळ येथील सभेत वसंत देशमुख यांनी जयश्री थोरात यांच्याबाबत आक्षेपार्ह वक्तव्य केले होते. काल पुण्यातुन स्थानिक गुन्हे अन्वेषण शाखेने वसंत देशमुखांना अटक केली होती. वसंत देशमुखांना अटक झाल्यानंतर प्राथमिक उपचारानंतर संगमनेर तालुका पोलीस ठाण्यात नेण्यात आले होते. त्यानंतर आज त्यांना न्यायालयात हजर केले असता संगमनेर न्यायालयाने त्यांना जामीन मंजूर केला आहे.  याबाबत संगमनेरचे पोलीस निरीक्षक देविदास ढुमणे म्हणाले की, वसंत देशमुख यांची अटकेपूर्वी तब्येत बिघडल्याने आणि त्यांची बायपास झालेले असल्याने संगमनेर येथे प्राथमिक तपासणी करण्यात आली. वैद्यकीय अधिकाऱ्यांनी त्यांना नाशिक येथील रुग्णालयात भरती करण्यास सांगितले होते. त्यानुसार त्यांना नाशिकमध्ये नेण्यात आले. आज सकाळी त्यांना संगमनेर न्यायालयात हजर करण्यात आले. न्यायालयाने वसंत देशमुखांना जामीन मंजूर केला असून त्यांच्यावर प्रतिबंधात्मक कारवाई करण्यासाठी त्यांना अतिरिक्त पोलीस अधीक्षक कार्यालयात नेण्यात आल्याची माहिती त्यांनी यावेळी दिली. भाजप नेते सुजय विखे यांच्या धांदरफळ येथील एका सभेत वसंत देशमुख यांना आमंत्रित करण्यात आले होते. या सभेत देशमुख यांनी जोरदार भाषण केले. या भाषणात त्यांनी बाळासाहेब थोरात यांच्या कन्येवर खालच्या भाषेत टीका केली. भर मंचावर आक्षेपार्ह शब्द वापरल्यानंतर खाली बसलेल्या श्रोत्यांनीही आनंदात टाळ्या वाजवल्या होत्या. या घटनेचा व्हिडीओ समोर आल्यानंतर महाराष्ट्रातून संताप व्यक्त करण्यात आला. देशमुख यांच्यावर कठोर कारवाई करावी, अशा मागणीसाठी जयश्री थोरात यांच्यासह काँग्रेस कार्यकर्त्यांनी संगमनेर पोलीस ठाण्याबाहेर तब्बल १२ तास ठिय्या मांडला होता. यानंतर पोलिसांनी वसंत देशमुखांना अटक केली होती.