२६ /११ च्या दहशतवादी हल्ल्यात सहभागी असलेला पाकिस्तानी व्यापारी तहव्वूर राणाला अमेरिकेकडून आज भारतात आणलं जाणार…

नवी दिल्ली : मुंबईतील २६ /११ हल्ल्याचा मास्टरमाईंड तहव्वूर राणाला आजच भारतात आणलं जाण्याची शक्यता आहे. तहव्वूर राणाला सुरूवातीच्या काळात दिल्लीत एनआयए कोठडीत ठेवलं जाण्याची शक्यता आहे. त्यानंतर तहव्वूर राणाला मुंबईत आणून खटला चालवला जाण्याची शक्यता आहे. आज रात्री उशिरा किंवा उद्या पहाटे तो मुंबईत दाखल होण्याची शक्यता आहे. तहव्वूर राणासाठी मुंबई आणि दिल्लीत दोन कारागृहात कोठडी तयार केली जातेय अशी माहिती आहे. तहव्वूर राणाला मुंबईत आणला तर आर्थर रोड जेलमध्ये अजमल कसाबला ठेवलेल्या कोठडीत त्याला ठेवलं जाईल अशी शक्यता आहे. अमेरिकेत भारतीय अधिकाऱ्यांच्या ताब्यात तहव्वूर राणाला देण्यात आल्याची माहिती आहे. आता तहव्वूर राणाला आजच भारतात आणलं जाईल अशी शक्यता आहे. भारतीय यंत्रणांच्या ताब्यात देण्यास तहव्वूर राणाचा विरोध होता. तशी याचिकाही त्याने अमेरिकन कोर्टात केली होती. मात्र अमेरिकेच्या सुप्रीम कोर्टानेही ही याचिका फेटाळल्यावर त्याची उरलीसुरली आशाही संपली. आता तहव्वूर राणावर भारतात आणून मुंबई दहशतवादी हल्ल्याप्रकरणी खटला चालवला जाईल. १९६१ मध्ये पाकिस्तानमध्ये जन्मलेल्या तहव्वुर राणाने सुरुवातीला पाकिस्तानी सैन्यात डॉक्टर म्हणून काम केले आणि नंतर १९९० च्या दशकाच्या उत्तरार्धात तो कॅनडाला गेले. कॅनेडियन नागरिकत्व मिळाल्यानंतर तो शिकागो येथे स्थायिक झाला जिथे तो इमिग्रेशन कन्सल्टन्सीसह विविध व्यवसाय चालवत होता.२००९ मध्ये राणाला २००८ च्या मुंबई हल्ल्यात सहभागी असल्याबद्दल अटक करण्यात आली होती, ज्यामध्ये १६० हून अधिक लोक मारले गेले होते. प्रेषित मुहम्मदचे वादग्रस्त व्यंगचित्र प्रकाशित करणाऱ्या जिलँड्स-पोस्टेनवरील हल्ल्याच्या प्रयत्नाशीही त्याचा संबंध होता. राणावर १२ गुन्ह्यांचा आरोप होता. ज्यामध्ये अमेरिकन नागरिकांच्या हत्येला मदत करणे आणि प्रोत्साहन देणे यांचा समावेश होता.