मागच्या वर्षी गौतमी पाटीलचा पाईपलाईन रोडवर कार्यक्रम पार पडला होता. या कार्यक्रमासाठी तिने संमती घेतली नव्हती. या प्रकरणावरुन गौतमी पाटीलवर पोलिसांच्या फिर्यादीवरुन तोफखाना पोलीस ठाण्यात गुन्हा दाखल करण्यात आला होता. या प्रकरणी आता गौतमी पाटीलला जामीन मंजूर झाला आहे. मागील वर्षी गणपती उत्सवा दरम्यान रस्त्यावर मंडप टाकून रहदारीस अडथळा होईल अशा पद्धतीने हा कार्यक्रम करण्यात आला होता. यानंतर गौतमी पाटील,तिचे मॅनेजर आणि गणपती मंडळाचे अध्यक्ष यांच्यावर गुन्हा दाखल करण्यात आला होता.
(सौजन्य.सोशल मिडिया. गौतमी पाटील.)
रस्त्यात अडथळा निर्माण होईल असा कार्यक्रम घेतल्यामुळे गुन्हा दाखल.
अहमदनगर शहरातील पाईपलाईन रोडवर गुरूवारी सायंकाळी मृत्युंजय प्रतिष्ठान आणि एकदंत मित्र मंडळ यांच्यावतीने गौतमी पाटीलच्या नृत्याचा कार्यक्रम आयोजित करण्यात आला होता. यावेळी गौतमी पाटीलच्या कार्यक्रमास प्रशासनाने परवानगी नाकारली होती. मात्र तरीही हा कार्यक्रम घेतल्यामुळे पोलिसांनी आता गौतमी पाटील, तिचा स्वीय सहाय्यक अशोक खरात आणि कार्यक्रमाचे आयोजक असलेले मृत्युंजय प्रतिष्ठान गुलमोहर रोड आणि एकदंत मित्र मंडळाचे अध्यक्ष राहुल सांगळे, आनंद कैलास नाकाडे, हर्षल किशोर भागवत, यांच्यावर तोफखाना पोलीस ठाण्यात रस्त्यात अडथळा निर्माण होईल असा कार्यक्रम घेणे तसेच सर्वोच्च न्यायालयाने ध्वनीक्षेपकाबाबत घालून दिलेल्या अटी आणि शर्तीचे उल्लंघन केल्याप्रकरणी भादवी कलम १८८,२८३,३४१, ३४ सह पर्यावरण संरक्षण अधिनियम १९८६ चे कलम २,१५ आणि ध्वनी प्रदूषण अधिनियम २००० चे कलम ३,४,५, ६ आणि मु.पो.का.क ३७ (१) (२)/१३५ प्रमाणे गुन्हा दाखल केला होता. या प्रकरणात गौतमी पाटीलला जामीन मंजूर झाला आहे.
(संग्रहित दृश्य.)
अटी शर्थींसह जामीन मंजूर !
गौतमी पाटील अहमदनगर येथील न्यायालयात हजर झाली होती. त्यानंतर तिला अटी शर्थींसह जामीन मंजूर करण्यात आला आहे. गणेशोत्सवाच्या काळात गौतमी पाटीलच्या कार्यक्रमांना मोठ्या प्रमाणात गर्दी होण्याची शक्यता लक्षात घेऊन तिच्या कार्यक्रमांना परवानगी नाकारण्यात आली होती. कायदा आणि सुव्यवस्थेचं कारण देऊन परवानगी नाकारण्यात आली होती. त्यानंतरही गौतमीचा कार्यक्रम झाल्याने तिच्यावर गुन्हा दाखल करण्यात आला होता.
