लोकप्रिय अभिनेता आणि त्याच्या प्रेयसीला एका चाहत्याच्या खूनाप्रकरणी पोलिसांनी ठोकल्या बेड्या….

शहरातील एका नाल्यात एक अज्ञात मृतदेह पडून आहे, अशी माहिती स्थानिकांनी पोलिसांना दिली होती. नंतर मृतदेह शवविच्छेदनासाठी पाठवण्यात आला आणि फॉरेन्सिक रिपोर्टनुसार त्याचा खून झाल्याचे स्पष्ट झाले आहे. याप्रकरणी तपास करत पोलिसांनी ११ जणांना अटक केली आणि त्यांच्या जबाबाच्या आधारे दर्शन आणि पवित्रा यांना अटक करण्यात आली आहे. या खूनात अभिनेता दर्शन थेट सहभागी होता की तो फक्त कट रचण्यात सहभागी होता हे शोधण्यासाठी आम्ही तपास करत आहोत,असे पोलीस अधिकारींनी  सांगितले आहे. कामाक्षीपल्य पोलीस स्टेशनच्या हद्दीतील पट्टणगेरे भागातील एका शेडमध्ये रेणुकास्वामीची हत्या केल्यानंतर त्याचा मृतदेह जवळच्या नाल्यात फेकण्यात आला होता. रेणुकास्वामीला मारहाण झाली व त्याचा खून झाला तेव्हा दर्शन व पवित्रा दोघेही तिथे उपस्थित होते, असे पोलिसांनी म्हटले आहे. अज्ञात व्यक्तीचा मृतदेह सापडल्यावर त्याच्या शरीरावरील जखमांच्या आधारे खुनाचा गुन्हा दाखल करण्यात आला आहे. सीसीटीव्ही फुटेज आणि इतर पुराव्यांच्या आधारे मृताची ओळख पटवण्यात आली आणि त्याचे नाव रेणुकास्वामी असल्याचे कळाले आहे, असे बंगळुरूचे पोलीस आयुक्त बी. दयानंद यांनी सांगितले आहे.

स्त्रोत सोशल मिडिया

खूनात दर्शन आणि पवित्राचा सहभाग आहे की….

मृत रेणुकास्वामी हा मूळचा चित्रदुर्ग इथला रहिवासी होता आणि तो एका फार्मा कंपनीत काम करायचा. त्याला चित्रदुर्गहून २०० किलोमीटर दूर बंगळुरूला आणून मग खून करण्यात आला आहे. मृताने सोशल मीडिया पोस्टमध्ये पवित्रा गौडाबद्दल अपमानास्पद कमेंट्स केल्याचा आरोप आहे. बंगळुरू शहराचे पोलीस आयुक्त बी दयानंद म्हणाले की आतापर्यंतच्या तपासावरून असे दिसून येत आहे की पवित्राबद्दल इन्स्टाग्रामवर अपमानास्पद कमेंट्स केल्यामुळे आणि मेसेज पाठवल्यामुळे दर्शन रेणुकास्वामीवर चिडला होता. ४७ वर्षीय दर्शनला म्हैसूरमधून या खून प्रकरणात अटक करण्यात आले आहे. पोलिसांनी मृतदेह सापडल्यानंतर रेणुकास्वामीच्या आई-वडिलांना माहिती दिली आहे. मुलाच्या खूनाबद्दल कळताच त्यांनी हंबरडा फोडला. “तो माझा एकुलता एक मुलगा होता. गेल्या वर्षीच त्याचे लग्न झाले आहे. मी शनिवारीच त्याच्याशी बोललो होतो, आम्हाला न्याय पाहिजे,” असे त्याचे वडील श्रीनिवासय्या हे म्हणले आहेत. कर्नाटकचे गृहमंत्री जी परमेश्वरा म्हणाले, “चित्रदुर्गातील एका व्यक्तीची बंगळुरूमध्ये हत्या करण्यात आली. याप्रकरणी काही लोकांना अटक करण्यात आली आहे आणि त्यांच्या चौकशीदरम्यान दर्शनचे नाव समोर आले आहे, त्यामुळे त्याला चौकशीसाठी आणण्यात आले आहे. या खूनात दर्शनचा सहभाग आहे की नाही, त्याबद्दल तपास होईपर्यंत काहीही सांगता येणार नाही. हत्येमागचे कारण काय ? त्याचे नाव या प्रकरणात का आले ? या सर्व गोष्टींची उत्तरे  तपासानंतरच मिळतील.”