आई-बाबा मला माफ करा,आपला एकत्र प्रवास इथेच संपतो आहे ; हॉस्टेलमध्ये आढळला बारावीच्या विद्यार्थिनीचा मृतदेह.

उत्तर प्रदेशातील गोरखपूरमध्ये जॉइंट एन्ट्रन्स एक्झामिनेशन (जेईई) मेन २०२५ मध्ये कमी गुण मिळाल्याने निराश झालेल्या एका १२ वीच्या विद्यार्थीनीने आत्महत्या केली आहे. आत्महत्येच्या आधी लिहिलेल्या चिठ्ठीत तिने पालकांची माफी मागितली त्यानंतर गळफास घेऊन आत्महत्या केली आहे. इंडिया टुडेने यासंदर्भातील वृत्त दिलं आहे. अभियांत्रिकी प्रवेशासाठी घेण्यात येणाऱ्या स्पर्धात्मक परीक्षेच्या जेईई मेन्सचा निकाल मंगळवारी जाहीर झाला. १८ वर्षीय या विद्यार्थिनीने गोरखपूरमधील एका खाजगी कोचिंग इन्स्टिट्यूटमध्ये प्रवेश घेतला होता. पण सतत येणाऱ्या कमी गुणांमुळे ती निराश झाली होती. या निराशेला तोंड देता येऊ न शकल्याने तिने बुधवारी आत्महत्या केली, असा दावा पालकांनी केला आहे. दरम्यान, तिच्या खोलीत सुसाईड नोट सापडली आहे. यामध्ये तिने लिहिलंय की, आई आणि बाबा मला माफ करा.आपला एकत्र प्रवास इथेच संपतो आहे. आता रडू नका. तुम्ही दोघांनी मला अपार प्रेम दिले. पण मी तुमची स्वप्ने पूर्ण करू शकले नाही. अशी खंत तिने सुसाईड नोटमध्ये लिहिली आहे. संबंधित तरूणी दोन दिवसांपूर्वी घरातून हॉस्टेलमध्ये राहत होती. बुधवारी सकाळी ती तिच्या वडिलांशी बोललीही आणि मोबाईल फोनही रिचार्ज केला होता. ती नैराश्येत असल्याने तिने तिच्या रिझल्टविषयी कोणाशी बोलू नये असा सल्ला तिच्या वडिलांनी तिला दिला होता. तिच्या वडिलांनी तिला धीर देण्याचा खूप प्रयत्न केला. तसंच पुढच्या परीक्षेसाठी तयारी करण्यासाठी प्रोत्साहितही केलं होत. पण तरीही त्यांची मुलगी इतक्या टोकाचा निर्णय घेईल, याची कल्पनाही नव्हती असं तिच्या वडिलांनी म्हटलंय आहे.

(संग्रहित दृश्य.)