पोलीस उपअधीक्षकांवर गोळीबार करणारा आरोपी जिल्हा रुग्णालयातून पसार ; पोलिसांच्या हातावर तुरी देत असा झाला पसार…..

अहिल्यानगरमधून एक खळबळजनक घटना समोर आली आहे. जीवे मारण्याचा प्रयत्न आणि अन्य गंभीर गुन्ह्यांमध्ये आरोपी असलेला सुनील लोखंडे जिल्हा रुग्णालयातून उपचारादरम्यान फरार झाला.आज मंगळवारी (दि. १०) उपचार सुरू असताना आरोपीने संधी साधत बंदोबस्तासाठी असलेल्या गार्डची नजर चुकवली आणि रुग्णालयातून पलायन केले. सुरक्षेची जबाबदारी असलेल्या कर्मचाऱ्यांना गुंगारा देत आरोपीने पळ काढल्याने पोलीस दल आणि रुग्णालय प्रशासनात मोठी खळबळ उडाली आहे.पोलिसांकडून फरार झालेल्या आरोपीचा शोध सुरु आहे. सुनील लोखंडे हा गेल्या सहा दिवसांपासून अहिल्यानगर जिल्हा रुग्णालयात उपचार घेत होता. उपचारासाठी त्याला कारागृहातून रुग्णालयात हलवण्यात आले होते. त्याच्या सुरक्षेसाठी पोलीस गार्ड आणि रुग्णालयातील कर्मचारी तैनात करण्यात आले होते.

(संग्रहित दृश्य.)

पोलिसांच्या कार्यक्षमतेवर प्रश्नचिन्ह ?

फरार आरोपी सुनील लोखंडे याने याआधी पोलीस उपअधीक्षक संदीप मिटके यांच्यावर गोळीबार केला होता. या घटनेनंतर त्याला अटक करण्यात आली होती. गोळीबार प्रकरणी तो कारागृहात शिक्षा भोगत होता. त्याला सहा दिवसांपूर्वी उपचारासाठी जिल्हा रुग्णालयात दाखल करण्यात आले होते. मात्र आज त्याने गार्ड आणि हॉस्पिटलमधील कर्मचाऱ्यांची नजर चुकवून पळ काढला. या घटनेनंतर पोलिसांकडून आरोपीचा शोध सुरू आहे. सीसीटीव्ही फुटेज आणि इतर माहितीच्या आधारे पोलीस तपास करत आहेत. मात्र, या घटनेमुळे पोलिसांच्या कार्यक्षमतेवर प्रश्नचिन्ह उपस्थित होत आहेत.