अ.नगर : शहरातील मध्यवर्तीच्या ठिकाणी असलेल्या बाजारपेठ व मध्य शहरात दिवसेंदिवस पार्किंगची समस्या वाढत आहे. नागरिकांसह व्यापाऱ्यांना देखील या समस्येचा मोठा त्रास सहन करावा लागत असल्यामुळे आता पार्किंगची पर्यायी व्यवस्था महानगर पालिकेच्या वतीने करण्यात येणार आहे. सर्जेपुरा येथील महानगरपालिकेच्या मालकीचे असलेले रंगभवन व्यापारी संकुल पाडून त्याजागी आता व्यापारी संकुल, सांस्कृतिक सभागृह व पार्किंग व्यवस्था असलेले बहुमजली संकुल उभारण्यात येणार आहे. मध्य शहर व बाजारपेठेतील पार्किंग समस्या मार्गी लावण्यासाठी या संकुलात व्यवस्था करण्यात येणार आहे. संकुलातील तीन मजल्यावर ४१० दुचाकी व १०० चारचाकी वाहनांसाठी पार्किंगची व्यवस्था करण्यात येणार आहे. त्यामुळे मध्य शहरातील व बाजारपेठेतील पार्किंगची समस्या दूर होण्यास मदत होणार असल्याची माहिती आयुक्त तथा प्रशासक यशवंत डांगे यांनी दिली आहे. सध्याच्या रंगभवन व्यापारी संकुलात तळ मजल्यावर १८ गाळे आहेत. आमदार संग्राम जगताप यांच्या पुढाकारातून महानगरपालिकेने स्वतःच हे व्यापारी संकुल उभारण्याचा निर्णय घेतला आहे. त्याचा आराखडाही तयार करण्यात आला आहे.

(संग्रहित दृश्य.)

असे असेल नवीन संकुल.

संकुलात ४८ व्यावसायिक गाळे, सांस्कृतिक सभागृह व पार्किंग असणार आहे. शहरातील बाजारपेठेकडे जाणाऱ्या मुख्य रस्त्यावर व बाजारपेठेजवळच हे संकुल असल्याने बाजारपेठेतील पार्किंगचा प्रश्न या संकुलामुळे मार्गी लागणार आहे. नवीन रंगभवन व्यापारी संकुलात तळघर पार्किंग, तळमजला पार्किंग व २४ गाळे, पहिला मजल्यावर  पार्किंग व २६ गाळे, दुसऱ्या व तिसऱ्या मजल्यावर पार्किंग, तर चौथ्या मजल्यावर सांस्कृतिक सभागृह अशी व्यवस्था असणार आहे. नव्याने संकुल उभारणीसाठी तयार करण्यात आलेला आराखडा नगररचना विभागाकडे तपासणीसाठी पाठवून त्याचा आराखडा मंजूर करून अंदाजपत्रक तयार करण्यात येत आहे. संकुलाच्या उभारणीसाठी सुमारे ३५ कोटींचा खर्च अपेक्षित असून, राज्य व केंद्र शासनाच्या अर्बन चॅलेंज योजनेतून निधी मिळवण्यासाठी प्रस्ताव सादर करण्यात येणार असल्याचे आयुक्त तथा प्रशासक यशवंत डांगे यांनी सांगितले आहे. बाजारपेठ व मध्य शहरात दिवसेंदिवस पार्किंगची समस्या वाढत आहे. त्यामुळे व्यापारी संकुलांमध्ये पार्किंगसाठी अधिकाधिक जागा पार्किंगसाठी उपलब्ध करून देण्याचा निर्णय महानगरपालिकेने घेतला आहे. सर्जेपुरातील रंगभवन व्यापारी संकुलात तीन मजले केवळ पार्किंगसाठी राखून ठेवण्यात आले आहेत. बहुमजली पार्किंग असणारे शहरातील व महानगरपालिकेचे हे पहिलेच व्यापारी संकुल उभारण्यात येणार आहे. यामुळे मध्य शहरातील बाजारपेठेतील पार्किंगची समस्या सुटण्यास मदत होईल, असा विश्वास आयुक्त तथा प्रशासक यशवंत डांगे यांनी व्यक्त केला आहे.