विधानसभा निवडणुकीचे निकाल येण्यास सुरूवात झाली असून त्यामध्ये अनेक धक्कादायक कल दिसून येत आहे. काँग्रेसचे अनेक दिग्गज पिछाडीवर असल्याचं दिसून आलं आहे. मुख्यमंत्रिपदाच्या शर्यतीत असलेले काँग्रेसचे बाळासाहेब थोरात, पृथ्वीराज चव्हाण, यशोमती ठाकूर, लातूरचे दोन्ही देशमुख बंधू हे पिछाडीवर असल्याचं दिसून येतंय. ही आकडेवारी सकाळी १० वाजताची असून त्यामध्ये पुढे बदल होण्याची शक्यता आहे. कराड दक्षिणमधून लढत असलेले पृथ्वीराज चव्हाण हे पिछाडीवर असल्याचं दिसून आलं आहे. त्या ठिकाणी भाजपचे अतुल भोसले आघाडीवर आहेत. संगमनेरमध्ये सर्वात धक्कादायक बातमी येण्याची शक्यता असून बाळासाहेब थोरात हे पिछाडीवर असल्याचं दिसून आलं. त्या ठिकाणी भाजपचा उमेदवार आघाडीवर आहे. लातूर शहरमधून लढत असलेले अमित देशमुख हे पिछाडीवर आहेत. त्या ठिकाणी भाजपचे उमेदवार अर्चना पाटील चाकूरकर या आघाडीवर आहे. तर लातूर ग्रामीणमधून धिरज देशमुख हे पिछाडीवर आहेत. तिवसा मतदारसंघातून काँग्रेसच्या फायरब्रँड नेत्या यशोमती ठाकूर या पिछाडीवर असल्याचं दिसून येतंय. संपूर्ण देशाचं लक्ष लागून असलेल्या महाराष्ट्राच्या विधानसभेचा निकाल जाहीर होण्यास सुरुवात झाली आहे. प्रत्येक मतदारसंघात कुणी मारली बाजी? कोण होणार तुमचा आमदार? कुणाची येणार सत्ता? काय घडामोडी घडणार? राष्ट्रपती राजवट लागणार का? कोण होणार किंगमेकर?
