आईच्या प्रियकराला संपवले ; आईशी अनैतिक संबंध असल्याचा राग मनात धरून अल्पवयीन मुलांनी दगडाने ठेचून केला कामगाराचा खून.

SANGLI CRIME / SANGLI POLICE   : सांगलीवाडी ते कदमवाडी रस्त्यावर गुरुवारी (दि. २०) दुपारी एका कामगाराचा दगडाने ठेचून खून करण्यात आल्याची धक्कादायक घटना घडली होती. या प्रकरणाचा यशस्वी छडा आता पोलिसांना लावला आहे. आईसोबत कामगाराचे अनैतिक संबंध असल्याच्या रागातून अल्पवयीन मुलाने आपल्या मित्रांसमवेत ही हत्या केल्याचे निष्पन्न झाले. या प्रकरणी पोलिसांनी तीन जणांना ताब्यात देखील घेतले आहे. याबाबत अधिक माहिती अशी की, सांगलीवाडीहून नदीकाठाने कदमवाडीकडे जाणार्‍या रस्त्यावर दत्ता सुतार (३५ रा. इंदिरानगर, सांगली) या कामगाराचा खून झाल्याची घटना गुरुवारी दुपारी उघडकीस आली होती. मृतदेहाजवळच मृताची दुचाकी आढळून आली होती. हल्लेखोरांनी दगडाने कामगाराला ठेचले. यामुळे तीव्र अतिरक्तस्त्राव झाल्याने त्याचा जागीच मृत्यू झाला. 

(संग्रहित दृश्य.)

तिघेही अल्पवयीन…

याबाबत सांगली शहर पोलीस ठाण्यास माहिती मिळताच पोलिसांनी घटनास्थळी धाव घेत माहिती घेतली. घटनास्थळी हल्लेखोरांनी चाकू व कोयता टाकला असला तरी त्यावर रक्ताचे डाग दिसत नव्हते. यामुळे या हत्याराचा वापर केला गेला की नाही ? याचा उलगडा होत नव्हता. हा खून अनैतिक संबंधातून झाला असल्याचा अंदाज वर्तवण्यात येत होता. यानंतर पोलिसांनी तपासाची चक्रे फिरवली आणि अवघ्या काही तासातच तीन संशयितांना ताब्यात घेतले. या तिघांची चौकशी केली असता एकाने त्याच्या आईबरोबर दत्ताचे अनैतिक संबंध असल्याचे सांगितले.आई सोबत अनैतिक संबंध असल्याच्या रागातून दोघा साथीदारांच्या मदतीने त्याने खून केल्याची कबुली दिली आहे. पोलीस तपासात तिघेही अल्पवयीन असल्याचे स्पष्ट झाले आहे. आज शुक्रवार (दि.२१) या तिघांना न्यायालयासमोर हजर केले जाणार आहे.