हिंजवडी हत्याकांड ! ती गाडी जळाली नाही तर जाळली गेली,दिवाळी बोनससह पगार थकवला आणि चालक असून मजुरांची कामे सांगितली म्हणून चालकानेच केला खेळ !

पुणे : पुण्यातील हिंजवडीत टेम्पो ट्रॅव्हल्स जळीत कांड प्रकरणाचे धक्कादायक वळण समोर आले आहे. ट्रॅव्हल्सला आग लागली नाही तर चालकाने गाडी पेटवल्याचं तपासात निष्पन्न झालं आहे. त्यामुळं चार जणांचा जीव घेतल्याप्रकरणी अन पाच जणांचा जीव घेण्याचा प्रयत्न केल्याप्रकरणी चालकाव आता गुन्हा दाखल करण्यात आला आहे. तीन कर्मचाऱ्यांचा जीव घेण्याच्या उद्देशाने टेम्पो ट्रॅव्हल्स पेटवून देण्यात आल्याचं हे कृत्य चालकाने केल्याचं तपासात उघड झालं आहे. मात्र ज्यांना जीवे मारायचं होते ते यातून बचावले आणि निष्पाप चौघांचा यात बळी गेला आहे. दिवाळी बोनससह पगार थकवला आणि चालक असून मजुरांची कामं सांगितली जात होती. म्हणून चालक जनार्दन हंबर्डीकरने हा कट रचला होता. मात्र पोलिसांच्या तपासात त्याचं बिंग फुटलं. तर ज्या चार जणांचा दुर्दैवी मृत्यू झाला त्यांनी दाराचे लॉक चुकीच्या पध्दतीने उगडण्याचा प्रयत्न केलाने तो लॉक झाला असल्याची माहिती समोर आली आहे. हिंजवडीत मिनी बसमध्ये लागलेल्या आगीने अवघ्या १०० मीटर अंतरातच रौद्ररूप धारण केले. कारण त्यात वाहनचालकाने ठेवलेले ज्वलनशील बेंझिन सोल्यूशन होते. शॉर्टसर्किटमुळे लागलेली आग इतक्या कमी वेळेत पसरत नाही. शिवाय आपत्कालीन दरवाजा उजव्या बाजूने उघडण्याचा प्रयत्न केला. त्यामुळे तो उघडला गेला नसल्याचे आरटीओच्या अधिकाऱ्यांनी सांगितलंं आहे. चालकाने गाडीत बेंझिन सोल्यूशन ठेवल्याने बसने तत्काळ पेट घेतला आणि त्यात शॉर्टसर्किट झाले. त्या वेळी चालकाने गाडीचा ताबा सोडून वाहनाच्या बाहेर उडी घेतली. तसेच काही कर्मचारी बाजूच्या दरवाजातून बाहेर पडले. हे काही क्षणातच घडले. विनाचालक गाडी १०० मीटरचे अंतरदेखील पुढे गेली नाही, तेवढ्यात आग मोठ्या प्रमाणात पसरली. मागे बसलेल्या कर्मचाऱ्यांनी आपत्कालीन दारातून बाहेर पडण्याचा प्रयत्न केला, मात्र त्यांनी दाराचे लॉक चुकीच्या पद्धतीने काढण्याचा प्रयत्न केल्याने तो लॉक झाला. दरम्यान, गाडीत आगीमुळे आणि धुरामुळे श्वास घेण्यात अडचणी आल्या त्यानंतर गुदमरून कर्मचारी बेशुद्ध पडले. आगीत त्यांचा होरपळून दुर्दैवी मृत्यू झाला.