सात माहिण्यापुर्वी लग्न. सासरकडून वारंवार मानसिक शरीरीक छळ,पैश्याची मागणी या सगळ्याला कंटाळून नवविवाहितेने केली आत्महत्या ….

 विवाहाला अवघे सात महिने झाले असताना सासरच्या जाचाला कंटाळून देवळा येथील इंदिरानगरमधील एका नवविवाहितेने आपले जीवन संपवल्याची धक्कादायक घटना उघडकीस आली आहे. दुचाकी घेण्यासाठी माहेरहून पैसे आणावेत या मागणीसाठी वारंवार मानसिक व शारीरिक छळ सहन करावा लागल्याने तिने आत्महत्या केल्याची फिर्याद दाखल करण्यात आली आहे. या प्रकरणी पतीसह चौघांविरुद्ध देवळा पोलीस ठाण्यात गुन्हा दाखल करून त्यांना अटक करण्यात आली आहे. देवळा पोलीस ठाण्यात शंकर वसंत पवार यांनी दिलेल्या फिर्यादीनुसार अंबिका मयूर पवार (वय १९, रा. इंदिरानगर देवळा) हिच्यावर सासरच्या मंडळींकडून पैशासाठी वारंवार छळ केला जात होता. पती मयूर अंबादास पवार, सासू निर्मला अंबादास पवार, सासरे अंबादास पंडित पवार आणि नणंद पिंकी अंबादास पवार यांनी संगनमत करून अंबिकाला माहेरहून वीस हजार रुपये आणण्यासाठी तगादा लावला होता. पैसे न मिळाल्याने अंबिकाला वेळोवेळी शिवीगाळ दमदाटी आणि मारहाण करण्यात येत होती. दि.३१ मार्च २०२५  रोजी अंबिकाला मारहाण करून घरातून हाकलून दिल्याने ती शेजारी राहणाऱ्या आपल्या आईकडे गेली आणि दि.१ एप्रिल रोजी सायंकाळी ७ वाजता अंबिकाने आपल्या आईच्या घरी गळफास घेऊन आत्महत्या करण्याचा प्रयत्न केला. त्यावेळी आई सखुबाई हिने पाहताच तात्काळ दरवाजा तोडून तिला खाली उतरवले व उपचारासाठी सटाणा येथील रुग्णालयात दाखल केले. प्रकृती गंभीर असल्याने तिला नाशिक येथे हलवण्यात आले. मात्र वाटेतच तिचा मृत्यू झाला. या प्रकरणी फिर्यादी शंकर वसंत पवार (वाय ३२, रा. इंदिरानगर, देवळा) यांच्या तक्रारीवरून पतीसह चौघांविरोधात गुन्हा दाखल करण्यात आला आहे. पोलिसांकडून त्यांना अटक करण्यात आली आहे. या घटनेने संपूर्ण परिसरात हळहळ व्यक्त केली जात आहे. या प्रकरणी पुढील तपास देवळा पोलीस ठाण्याचे पोलीस निरीक्षक सार्थक नेहते यांच्या मार्गदर्शनाखाली सहाय्यक पोलीस निरीक्षक दीपक पाटील करीत आहेत.