५० हजार रुपयांच्या लाच प्रकरणात तलाठी आणि एक पत्रकार लाचलुचपत प्रतिबंधक विभागाच्या (एसीबी) जाळ्यात…

TIMES OF NAGAR 

मागील काही दिवसात लाचलुचपतचे अनेक प्रकरणे समोर आले. लाच घेताना अनेकांना ताब्यातही घेण्यात आले. तरी देखील यावर काही अंकुश येत नसल्याचे चित्र दिसत आहे. आता एका हाती आलेल्या वृत्तानुसार एक तलाठी आणि एक पत्रकार लाचलुचपतच्या जाळ्यात अडकले आहेत. तलाठी अक्षय ढोबळे आणि खासगी व्यक्ती पत्रकार रमजान नजीर शेख असे यांचे नाव असून हा प्रकार संगमनेर मध्ये समोर आलाय. हे ५० हजार रुपयांच्या लाच प्रकरणात लाचलुचपत प्रतिबंधक विभागाच्या (एसीबी) जाळ्यात अडकले आहेत. या प्रकाराने संगमनेरमध्ये खळबळ उडाली असून एसीबीच्या जाळ्यात सापडलेला रमजान नाजीर शेख नेमका कशाचा पत्रकार आहे याबाबत माहिती मिळू शकली नाही. खडी वाहतूक करणाऱ्या तक्रारदाराच्या गाड्यांवर कारवाई न करण्यासाठी आणि ती सुरळीत चालू ठेवण्यासाठी ही लाच मागण्यात आली होती. या दोघांविरुद्ध भ्रष्टाचार प्रतिबंधक अधिनियम १९८८ चे कलम ७, ७ अ व १२ प्रमाणे घारगाव पोलीस स्टेशन येथे गुन्हा दाखल करण्यात आला आहे. एसीबीच्या नाशिक युनिटने दिलेल्या माहितीनुसार तक्रारदार यांचा ट्रकद्वारे खडी वाहतूक करण्याचा व्यवसाय आहे. त्यांची वाहतूक सुरळीत सुरू राहावी आणि त्यांच्या ट्रकवर कोणतीही कारवाई होऊ नये यासाठी आरोपी रमजान नजीर शेख (वय २८) व्यवसाय पत्रकारिता व शेती, रा.मांडवे, ता.संगमनेर, जि. अहमदनगर) याने तलाठी अक्षय ढोबळे यांच्या सांगण्यावरून दि.१६ एप्रिल २०२५ रोजी तक्रारदाराकडे ४० हजार रुपयांची लाच मागितली.

(संग्रहित दृश्य.)

तक्रारदाराकडून ५० हजार रुपयांची लाच…

तक्रारदाराने यानंतर तलाठी अक्षय ढोबळे यांची रमजान नजीर शेख यांची समक्ष भेट व खडी ट्रक वाहतुकीबाबत चर्चा केली. त्यावर तक्रारदाराने तलाठी व पत्रकार यांना ५० हजार रुपये देण्याची तयारी दर्शवली. मात्र त्यांनी आपल्या खडी वाहतुकीच्या गाड्यांवर कारवाई करू नये आणि ती सुरळीत चालू ठेवावी अशी विनंती केली. यावर तलाठी अक्षय ढोबळे यांनी पैसे स्वीकारण्याची तयारी दर्शवली परंतु या बदल्यात गाड्या फक्त दोन महिनेच चालतील असे सांगितले. योजनेनुसार (दि.१६) एप्रिल २०२५ रोजी रात्री ८.३९ वाजता मांडवे येथील मारुती मंदिरासमोर आरोपी पत्रकार रमजान नजीर शेख याने पंच साक्षीदारांच्या समक्ष तक्रारदाराकडून ५० हजार रुपयांची लाच स्वीकारली. लाचेची रक्कम स्वीकारण्याबाबत रमजान शेख याने तलाठी अक्षय ढोबळे यांना दूरध्वनीवरून माहिती दिली आणि काय करावे असे विचारले. त्यावर ढोबळे यांनी ठीक आहे उद्या बघू असे म्हणून लाच घेण्यास संमती दर्शवली. या सापळा कारवाईत एसीबीच्या पथकाने आरोपी रमजान नजीर शेख याला ताब्यात घेतले आहे. तर तलाठी अक्षय ढोबळे यांच्याविरुद्ध गुन्हा दाखल करण्यात आला असून त्यांना अद्याप अटक करण्यात आलेली नाही.