बाबरी मशिदीचे पक्षकार इक्बाल अन्सारींनी फुले टाकून केले मोदींचे स्वागत. राम मंदिरासाठी बोलले कि…….

आमच्यासाठी विषय संपला

इक्बाल अन्सारी यांचे वडील हाशिम अन्सारी यांनी १९५२ पासून बाबरी मशिदीची कायदेशीर लढाई लढली होती. त्यांच्या निधनानंतर त्यांचे सुपुत्र इक्बाल अन्सारी हे या खटल्याचे पक्षकार होते. राम मंदिराचे आता निर्माण झाल्यानंतर काय वाटत आहे, असा प्रश्न त्यांना विचारला असता ते म्हणाले, “९ नोव्हेंबर २०१९ रोजी सर्वोच्च न्यायालयाने निकाल दिल्यानंतर संपूर्ण देशातील मुस्लीम नागरिकांनी त्याचा सन्मान केला. पूर्ण देशात एक पानही हलले नाही. हिंदू-मुस्लीमांचा बंधूभाव कायम आहे. त्यामुळे आमच्यासाठी हा विषय आता संपलेला आहे. राम मंदिर उभे राहिले, याचा आनंद वाटतो. २२ जानेवारीच्या सोहळ्याचे निमंत्रण मला अजून आलेले नाही. पण आले तर मी नक्की जाईन.

राजकीय नेते काहीतरी प्रतिक्रिया देऊन वाद निर्माण करतात.

इक्बाल अन्सारी म्हणाले मी समाजसेवक आहे. देशात हिंदू-मुस्लीम, मंदिर-मशीद यावरून वाद व्हायला नको. राजकीय नेते काहीतरी प्रतिक्रिया देऊन वाद निर्माण करतात, मौलाना फतवा काढतात, पण लोकांनी स्वतः विचार केला पाहीजे. याने देशाचा विकास होणार आहे का ? माणूस ज्यासाठी जन्माला आला आहे, तेच त्याने केले पाहीजे. एकमेकांना साहाय्य करायला हवे. विकासासाठी, रोजगारासाठी प्रयत्न केले पाहीजेत. हिंदू-मुस्लीम धर्मीयांमध्ये दरी निर्माण होईल, असे कोणतेही काम आपल्या हातून व्हायला नको, याची काळजी सर्वांनीच घ्यावी.

बाबरीसाठी आता कुणीही आग्रही नाही.

बाबरी मशीदीसाठी मुस्लीम लोक आग्रही नाहीत.९ नोव्हेंबर रोजी सर्वोच्च न्यायालयाने निकाल दिला, तेव्हाच हा विषय संपला.यासाठी देशात कुठेही मागणी होत नाही किंवा कुणी आंदोलन करत नाही. सर्वोच्च न्यायालयाने पाच एकर जमीन मशीदीसाठी उपलब्ध करून दिली असून ती सुन्नी वक्फ बोर्डाच्या ताब्यात आहे. पण जमीन ज्याठिकाणी आहे, तिथे मशीदीची गरज नाही. मी तर सांगितले की, त्या जमिनीवर शेती करा, जे पिकेल ते दोन्ही धर्मीयांमध्ये वाटून टाका. अयोध्येत या आधी हिंदू-मुस्लीम यांचे ऐक्य होते आणि यापुढेही ते कायम राहिल. मी अयोध्येत राहतो याचा मला अभिमान वाटतो. मी येथील अनेक मठ-मंदिरात गेलो आहे आणि आता राम मंदिरातही जाईल असे इक्बाल अन्सारी म्हणाले.