दिल्लीहून वाराणसीला जाणाऱ्या इंडिगो विमानात बॉम्ब, विमानतळावर तणावाचे आणि दहशतीचे वातावरण….

TIMES OF AHMEDNAGAR

दिल्ली विमानतळावर विमानात बॉम्ब ठेवल्याची माहिती मिळाल्याने खळबळ उडाली आहे. ही माहिती समजल्यावर विमानतळावर तणावाचे आणि दहशतीचे वातावरण होते. दिल्लीहून वाराणसीला जाणाऱ्या इंडिगो विमान बॉम्बने उडवून देण्याची धमकी मिळाली होती. विमानात त्यावर ‘बॉम्ब’ लिहिलेला टिश्यू पेपर सापडला होता. मंगळवारी पहाटे ५.३५ वाजता बॉम्बच्या धमकीमुळे विमानतळावर घबराट पसरली होती. प्रवाशांना तातडीने विमानाच्या आपत्कालीन दरवाज्यातून बाहेर काढण्यात आले. याचा एक व्हिडिओही समोर आला आहे ज्यामध्ये प्रवासी आपत्कालीन गेटमधून बाहेर पडताना दिसत आहेत. काही प्रवाशांनी तर विमानाच्या खिडक्यांमधून उड्या मारल्या आहेत.  बॉम्ब शोधक पथक आणि इतर सुरक्षा यंत्रणा घटनास्थळी रवाना झाल्या आहेत.

स्त्रोत सोशल मिडिया

तपासणीनंतर ही धमकी खोटी असल्याचे निष्पन्न…

सीआयएसएफच्या एका वरिष्ठ अधिकाऱ्याने सांगितले की, दिल्ली विमानतळावरील इंडिगो फ्लाइट ६इ२२११  च्या टॉयलेटमध्ये ‘बॉम्ब’ शब्द लिहिलेला टिश्यू पेपर सापडला आहे. ही माहिती सुरक्षा यंत्रणांना देण्यात आली आहे. यंत्रणांनी केलेल्या तपासणीनंतर ही धमकी खोटी असल्याचे निष्पन्न झाले आहे. विमानात बॉम्ब ठेवल्याच्या धमकीनंतर उड्डाण ‘आयसोलेशन बे’ मध्ये नेण्यात आले आहे. दिल्ली अग्निशमन सेवेने सांगितले की, आज पहाटे ५.३५ वाजता दिल्लीहून वाराणसीला जाणाऱ्या विमानात बॉम्ब असल्याची माहिती मिळाली होती. यानंतर क्यूआरटी पथक तातडीने घटनास्थळी पोहोचले होते. सर्व प्रवाशांना इमर्जन्सी गेटमधून बाहेर काढण्यात आले आहे. सर्व प्रवासी सुरक्षित आहेत.