राष्ट्रवादी काँग्रेस पक्षाचे ज्येष्ठ नेते अनिल देशमुख यांच्यावर जीवघेणा हल्ला.

(संग्रहित दृश्य.)

सोमवारी रात्रीपासून मतदारसंघातील वातावरण…

काटोल मतदारसंघातील नरखेड येथे राष्ट्रवादी काँग्रेसचे उमेदवार सलील देशमुख यांची शेवटची प्रचार सभा होती. ती आटोपून अनिल देशमुख, सलील देशमुख व त्यांचे कार्यकर्ते नरखेडहून तीनखेडा, भीष्णूर,मार्गे काटोल येथे जात असताना पारडसिंगा या गावाजळील बेलफाटा नजीक देशमुख यांच्या वाहन ताफ्यावर अज्ञात इसमांनी जोरदार दगडफेक केली. बेलफाटा हा नरखेडहून काटोलकडे जातानाचा वळण मार्ग असून आजूबाजूला ओसाड भाग आहे. तेथे वाहने हळू होतात. याच काळात देशमुख यांच्या वाहन ताफ्यावर दगडफेक करण्यात आली. वाहनांच्या काचा फोडण्यात आल्या. देशमुख कारच्या पुढच्या सीटवर बसले होते. त्यामुळे त्यांना फुटलेली काच लागली व  त्यात ते जखमी झाले, असे या संदर्भात काटोल पोलिसांकडडे देण्यात आलेल्या तक्रारीत नमुद करण्यात आले आहे. घटनेची माहिती मिळताच देशमुख यांना पाहण्यासाठी काटोल ग्रामीण रुग्णालयात राष्ट्रवादीच्या कार्यकर्त्यांनी मोठी गर्दी केली होती. अनिल देशमुख यांच्या समर्थनार्थ व भाजपच्या निषेधार्थ नारे दिले जात होते. येथे तणावाची स्थिती निर्माण झाली होती. प्राथमिक उपचार झाल्यावर देशमुख यांना नागपूरमध्ये खासगी रुग्णालयात हलवण्यात आले आहे. तेथेही काटोलहून मोठ्या संख्येने कार्यकर्ते गेले. तेथेही घोषणा दिल्या जात होत्या. एकूणच सोमवारी रात्रीपासून मतदारसंघातील वातावरण तापले असून पोलिसांनी तपास सुरू केला आहे. अनिल देशमुख यांच्यावरील हल्ला हा त्यांनीच घडवून आणला तो राजकी स्टंट आहे, असा आरोप भाजप नेते अविनाश ठाकरे यांनी केला आहे. काटोल मतदारसंघात देशमुख पुत्र सलील पराभूत होणार हे दिसून आल्यावर अनिल देशमुख यांनी हा बनाव रचला, असा दावा ठाकरे यांनी केला आहे. दुसरीकडे या हल्ल्यामागे भाजपच असल्याची शंका काटोलचे उमेदवार व अनिल देशमुख यांचे पुत्र सलील देशमुख यांनी व्यक्त केली आहे.