भाजप नेता मुलीबरोबर चाळे करत होता हे व्हिज्युअल्स माझ्याकडे, ते मी वरिष्ठांना दाखवले, एकनाथ खडसेंच्या या वक्तव्याने राजकारणात खळबळ.

निवडणूक आल्यावर कशी धावपळ होते ते सगळे बघत आहेतच…

सध्याच्या घडीला महाराष्ट्र घाणेरडं राजकारण अनुभवतो आहे. तसंच सध्या मुख्यमंत्री एका पक्षाचा होऊच शकत नाही अशी स्थिती आहे. अशा स्थितीत मला मुख्यमंत्री होण्याची इच्छा मुळीच नाही असंही एकनाथ खडसेंनी सांगितलं. दुसऱ्याला आवरता आवरता किती सावरावं लागतंय आपण पाहतोय मग ती लाडकी बहीण योजना असो किंवा इतर. निवडणूक आल्यावर कशी धावपळ होते ते सगळे बघत आहेतच. असंही ते म्हणाले. एबीपी माझा या वृत्तवाहिनीला दिलेल्या मुलाखतीत एकनाथ खडसे यांनी हे वक्तव्य केलं आहे.

(संग्रहित दृश्य.)

मला विनाकारण यामध्ये गोवण्यात आलं.

काही एक-दोन व्यक्तींमुळे राजकारणाचा चिखल झाला आहे. मी नाव न घेता सांगेन की एका व्यक्तीमुळे महाराष्ट्राच्या राजकारणाचा चिखल झाला. ते नाव मी घेण्याची गरज नाही ते कुणालाही विचारा माहीत आहे. सूडाचं राजकारण, फोडाफोडीचं राजकारण सगळं महाराष्ट्रात घडलं आहे, त्याला एक व्यक्ती जबाबदार आहे. असं एकनाथ खडसेंनी म्हटलं आहे. ईडी, सीबीआय या यंत्रणांनी त्यांचं काम प्रामाणिकपणे केलं पाहिजे. नीरव मोदीला का सोडलं आहे ? माझ्या प्रकरणात माझा काय दोष आहे ? मला सांगा. मला विनाकारण यामध्ये गोवण्यात आलं आहे, असंही खडसे यांनी म्हटलं आहे.

(संग्रहित दृश्य.)

भाजप नेता मुलीबरोबर चाळे करत होता हे व्हिज्युअल्स होते.

ईडी म्हणाले म्हणून मी सीडी म्हटलं होतं. यमक जुळवून मी बोललो. माझ्याकडे काही कागदपत्रं आणि व्हिज्युअल्स होते. माझ्या मोबाइलमधला व्हिडीओ भाजपाच्या वरिष्ठांनाही दाखवला होता. बघा मुलीबरोबरचे चाळे. मी तो व्हिडीओ कुणाचा होता ते सांगणार नाही. मात्र नंतर मलाच समजलं नाही की मोबाइलमधून तो व्हिडीओ कसा डिलिट झाला. मी शपथेवर सांगतो मुक्ताईची शपथ घेऊन सांगतो माझ्याकडे भाजप नेता मुलीबरोबर चाळे करत होता हे व्हिज्युअल्स होते. मी ते भाजपाच्या वरिष्ठांना दाखवले होते. दिल्लीतल्या काही वरिष्ठांना दाखवलं होतं. त्यांनी ते पाहिलं होतं हे निश्चित. मला मोबाइल फार समजत नाही. १५ ते २० दिवस तो व्हिडीओ होता. मी पत्रकारांनाही दाखवलं होतं. मला थोडी भीतीही होती की याचा गैरवापर होईल.

(संग्रहित दृश्य.)

कुणाचं काय चारित्र्य आहे सगळ्यांना माहीत आहे.

मी माझ्या पीएला सांगितलं होतं की दुसरा मोबाइल आण आणि त्यात ट्रान्सफर कर. पण ते त्यावेळी काही झालं नाही. पण ते होतं हे निर्विवाद सत्य आहे. दुर्दैवाने ते डिलिट झालं. तुम्हाला जी नावं माहीत आहेत त्यांच्यापैकीच हा एक भाजपाचा नेता आहे. ज्याने मला हा व्हिडीओ दिला होता त्याला मॅनेज करुन टाकलं. त्याला एक फ्लॅट पाच ते दहा कोटी रुपये हे सगळं दिलं. आता तो माणूस त्यांच्या बाजूने आहे. त्याची आता २५ कोटींची प्रॉपर्टी आहे. सगळ्यांना माहीत आहे तो माणूस कोण आहे. हातात पुरावा नाही त्यामुळे मला फार बोलता येत नाही. कुणाचं काय चारित्र्य आहे सगळ्यांना माहीत आहे. असं एकनाथ खडसेंनी सांगितलं.