स्थानिक नागरिकांनी रवीना टंडनशी हुज्जत घालत तिला धक्काबुक्की केली, या घटनेवर कंगना रानौतचा तीव्र संताप व्यक्त….

शनिवारी रात्री रवीना टंडन आपल्या घरी परतत असताना त्यांच्या वाहनाच्या चालकाचा पार्किंगवरून काही महिलांशी वाद झाला होता. या वादाचा एक व्हिडीओ मोहसीन शेख नामक व्यक्तीने सोशल मीडियावर शेअर केला आहे. या व्हिडीओत रवीना टंडन वारंवार मारू नका, मारू नका, असे सांगत आहे. तर त्याचवेळी एक व्यक्ती आणि महिला रवीना टंडनच्या चालकावर मारहाणीचा आरोप करत आहे. दरम्यान या घटनेचे सीसीटीव्ही चित्रणही समोर आले आहे, ज्यामध्ये रवीना टंडनच्या वाहनाचा महिलेला धक्का लागलाच नसल्याचे दिसते. मुंबई पोलिसांनीही रवीना टंडनच्या विरोधातली तक्रार खोटी असल्याचे सांगितले आहे. यानंतर रवीना टंडननेही एक्स अकाऊंटवर सविस्तर माहिती दिली आणि पोलिसांचे आभार मानले आहेत. पोलीस उपायुक्त राज तिलक रोशन यांनी सांगितले की, या प्रकरणात आतापर्यंत खटला दाखल करण्यात आलेला नाही. रवीना टंडन शनिवारी घरी येत असताना त्यांचे वाहन मागे घेत असताना रस्त्यावरील महिलेने चालकाला सांभाळून वाहन चालविण्यास सांगितले होते. यावेळी वाहनाचा धक्का महिलेला लागला नव्हता. मात्र त्यांच्यात बाचाबाची झाली. रवीना टंडन यांनी वाद सोडविण्याचा प्रयत्न केला असता जमावाने त्यांनाही धक्काबुक्की केली आहे. या घटनेमध्ये कुणीही जखमी झाले नसल्याची माहिती पोलिसांनी दिली आहे. तसेच, कुणालाही मारहाण झाली नसून शाब्दिक बाचाबाचीमुळे हा वाद वाढला. मात्र, कार पार्किंगमुळे निर्माण झालेला हा वाद आता मिटला आहे, असे पोलिसांकडून सांगण्यात आले आहे.