आमदार संग्राम जगताप एक्शन मोडवर ; नागरिकांच्या समस्यांसाठी थेट पोलीस अधीक्षकांना सवाल… अधिकारी नागरिकांच्या संरक्षणासाठी की लुटमारीसाठी

पोलीस ठाण्यांचे प्रमुख अधिकाऱ्यां भोवती असलेले कर्मचारी केवळ अवैध धंद्याशी संपर्क असणारे आहेत. त्याचे पुरावे आमच्याकडे आहेत. पोलीस निरीक्षकांना जेवायला घेऊन जातात आणि तेथे तडजोडी करतात. अशा कर्मचाऱ्यांवर कारवाई करावी, त्यांची बदली करावी. अशा कर्मचाऱ्यांचे शहरात रॅकेट आहे. ते फक्त पैसे गोळा करत फिरतात. कापड बाजारात दुकाने खाली करून घेण्याच्या तडजोडी पोलीस ठाण्यामध्ये होतात. या पोलिसांवर कोणाचा धाक आहे की नाही हे तपासण्याची वेळ आली आहे असाही थेट आरोप आमदार जगताप यांनी केला. संदर्भात आमदार जगताप यांनी पोलीस अधीक्षकांना निवेदनही दिले आहे. शहरात महिलांच्या गळ्यातील मंगळसूत्र ओढण्याचे प्रकार वाढले आहेत. पूर्वी पोलीस गस्त घालायचे नागरिकांना भेटायचे चौकात असणाऱ्या वहीवर नोंदी करायचे अनुचित घटना घडल्यास तातडीने बीट मार्शल घटनास्थळी जायचे. परंतु अशी यंत्रणाच आता कोठे राहिली नाही. त्यामुळे नागरिकांच्या संरक्षणाचा प्रश्न निर्माण झाला आहे. पूर्वी शहर रात्री ११ वा. बंद केले जायचे. आता मात्र पहाटे तीन-चार पर्यंत वर्दळ दिसते. काही वेगळ्या विचारांचे लोक बसस्थानकावर फिरतात. ते कुठल्यातरी भागात राहतात. हेच दरोडेखोर असावेत. पोलिसांनी त्यांची वाहने कागदपत्रे तपासली पाहिजेत. विना क्रमांकाच्या गाड्या शहरात फिरतात. याकडेही लक्ष वेधण्यात आले. बुरुडगाव उपनगरात गेल्या काही महिन्यांपासून चोरट्यांनी धुमकुळ घातला आहे. पोलीस ठाण्यात गुन्हे दाखल करूनही तपास होत नाही. त्यामुळे कायदा व सुव्यवस्थेचा मोठा प्रश्न निर्माण झाला आहे. या भागात व्यापारी व प्रतिष्ठित उद्योजक राहतात. पोलीस अधीक्षकांनी या सर्व घटनांची वेळेस दखल घ्यावी व शहरात गस्त वाढवावी, अशी ही मागणी आमदार संग्राम जगताप यांनी केली आहे.