क्रिकेटच्या विश्वात बीडचा सचिन गाजला…..

दक्षिण आफ्रिकेत सुरू असलेल्या युवा (१९ वर्षांखालील) विश्वचषक क्रिकेट स्पर्धेतून भारताचा उद्याचा क्रिकेटर तयार होणार इतकी  सचिनची कामगिरी झाली आहे. या विश्वचषकात ११६.६६च्या स्ट्राईक रेटने सचिनच्या नावावर २९४ धावा जमा असून स्पर्धेतील सर्वोत्तम विजयवीरांमध्ये त्याची गणना केली जात आहे. सुपर सिक्स फेरीत नेपाळविरुद्ध शतकी खेळी केल्यानंतर उपांत्य फेरीत त्याने दक्षिण आफ्रिकेविरुद्ध केलेली ९६ धावांची निर्णायक ठरली. २४९ धावांचा पाठलाग करताना भारताची ४ बाद ३२ अशी स्थिती झाली होती. यातून सचिन आणि कर्णधार उदय सहारन यांनी भारताला बाहेर काढले. त्यामुळे भारताला नवव्यांदा अंतिम फेरीत धडक मारता आली.  

सचिन माझ्याकडे सर्वप्रथम आला तेव्हा तो अवघा साडेचार वर्षांचा होता. बीडमध्ये त्या वेळेस पूर्ण खेळपट्टय़ा नव्हत्या. दक्षिण आफ्रिकेला जाण्यापूर्वीही तो अध्र्या टर्फवरच सराव करत होता असे सचिनमधील क्रिकेटपटूला पैलू पाडणारे प्रशिक्षक शेख अझर यांनी सांगितले.  वडील संजय हे सचिन तेंडुलकरचे मोठे चाहते. त्यामुळेच २००५ मध्ये मुलाचा जन्म झाल्यावर त्यांनी त्याचे नाव सचिन असेच ठेवले. हा सचिन त्याच सचिनसारखी १० क्रमांकाची जर्सी घालत असला, तरी तो विराट कोहलीचा चाहता आहे.