बीडमध्ये महादेव मुंडेंच्या हत्येचा घटनाक्रम ; मुलांना घरी सोडलं आणि रात्री रक्त सांडलेली दुचाकी सापडली तर त्या पोलिसाचा कुटुंबियांना फोन !

MAHADEV MUNDE / SURESH DHAS  बीड : मस्साजोग गावचे सरपंच संतोष देशमुख हत्या प्रकरणाचा तपास चालू असतानाच १४ महिन्यापूर्वी परळीत महादेव मुंडे यांचा खून झाल्याचे प्रकरण पुढे आले होते. याही प्रकरणाचा तपास करण्यासाठी बीडच्या जिल्हा पोलीस अधीक्षकांनी एक स्वतंत्र पथक स्थापन केले आहे. भाजपचे आष्टीचे आमदार सुरेश धस यांच्यापासून अंजली दमानिया आणि अनेक नेत्यांनी महादेव मुंडे यांच्या खुनाच्या तपासाची मागणी केली आहे. महादेव मुंडे हे पिग्मी वसूल करायचे त्यासोबतच पैशाची भिशी चालवायचे. साधे राहणीमान आणि ज्यांच्याशी व्यवहार येईल तेवढ्याच लोकांशी संबंध ठेवायचे विशेष म्हणजे राजकीय अथवा इतर कोणत्याही व्यक्तीसोबत फारसा संबंध न ठेवणाऱ्या महादेव मुंडे यांचा अतिशय निर्घृणपणे खून करण्यात आला होता. हा खून एकतर चोरीच्या उद्देशाने केला असावा, असा संशय कुटुंबियांना आहे. कारण गळ्यातील लॉकेट, पैसे आणि मोबाईलसह सगळ्या वस्तू गायब झाल्या होत्या. अनेक चकरा मारूनही प्रकरणाचा तपास लागत नसल्याने मुंडे कुटुंबीयांनी सदरील प्रकरण एलसीबीला वर्ग करण्याची विनंती परळी पोलीस ठाण्याचे तत्कालीन पोलीस निरीक्षक सानप यांना केली होती.

(संग्रहित दृश्य.)

एवढेच नाही तर १६ डिसेंबर २०२३ ला महादेव मुंडे यांना न्याय मिळावा यासाठी परळी बंदचे आवाहन करण्यात आले होते. तीन महिने उलटूनही हत्येचा कुठलाच तपास होत नसल्याचे दिसून आल्यावर मुंडे कुटुंबियांनी हायकोर्टाच्या औरंगाबाद खंडपीठात याचिका दाखल केली होती. याचिका दाखल केल्यानंतर संतोष देशमुख यांचं हत्या प्रकरण समोर येईपर्यंत साधारण आठ ते नऊ महिने या प्रकरणाची कुठलीही चर्चा झालेली नव्हती. मात्र संतोष देशमुख हत्या प्रकरणानंतर आमदार सुरेश धस यांनी प्रामुख्याने महादेव मुंडे यांच्या खुनाचे प्रकरण हे संशयास्पद असून त्याचा फेरतपास करण्याची मागणी बीडचे पोलीस अधीक्षक नवनीत कावत यांना भेटून केली त्या दिवसानंतर महादेव मुंडे यांच्या खुणाच्या तपासाला वेग आला आहे. महादेव मुंडे यांच्या खुनाच्या तपासासाठी बीडच्या पोलीस अधीक्षकांनी आता एक पथक स्थापन करून चौकशीला सुरुवात केली आहे. मात्र तब्बल १४ महिने महादेव मुंडे यांचा खून कोणी केला याची मागणी कुटुंबीय करत असताना पोलिसांनी मात्र कोणतीच भूमिका घेतली नव्हती. म्हणूनच आता जर १४ महिन्यानंतर महादेव मुंडेचे मारेकरी पोलिसांना सापडणार नसतील तर मग न्याय मागायचा तरी कुणाकडे असा प्रश्न महादेव मुंडे यांच्या कुटुंबीयांना पडला आहे. 

(संग्रहित दृश्य.)

महादेव मुंडे हत्याकांड……

* २० आक्टोबर २०२३ रोजी संध्याकाळी महादेव मुंडे यांनी ६ वाजता ट्युशनवरुन मुलांना घरी सोडले होते. 

* त्यानंतर पिग्मीचे कलेक्शन केले. गणेश पार, हनुमान नगर, मोंढा मार्केट, शेवटला शिवाजी चौकात ७.१० मिनिटाला सीसीटीव्ही मध्ये दिसले. आझाद चौकात मित्राला भेटले होते. 

* आझाद चौक पासून ३०० मीटर अंतरावर असलेल्या वनविभागाच्या कार्यालयासमोर त्यांची मोटरसायकल रात्री ९ वाजता आढळून आली होती.

* मुंडेंची गाडी पोलिसांनी पोलीस ठाण्यात आणून लावली आणि याच गाडीवर रक्त देखील सांडलेले होते अशी कुटुंबीयांनी माहिती दिली आहे.
 
* याच गाडीमध्ये आधारकार्ड, पॅन कार्ड, बँकेचे पासबुकसह, आणखी काही कागदपत्रे होती. 

* ही मोटरसायकल सापडली. मात्र महादेव मुंडे कुठे होते हे माहिती नाही. या मोटरसायकल जवळ दोन चपला सापडल्या. यामध्ये एक चप्पल महादेव मुंडे यांची होती, तर दुसरी कोणाची होती याबाबत अद्यापही माहिती मिळाली नाही.

* दुसऱ्या दिवशी सकाळी जिथे मोटरसायकल सापडली त्यापासून ५० मीटर अंतरावरच महादेव मुंडे यांचा मृतदेह सापडला. मात्र, हा मृतदेह रात्री पोलिसांना का दिसला नाही, असा प्रश्न सध्या निर्माण झाला आहे.

* २१ ऑक्टोबर २०२३ रोजी सकाळी ७: १० मिनिटाला पोलीस कॉन्स्टेबल भास्कर केंद्रे यांनी महादेव मुंडे यांचे मेहुणे सतीश फड यांना फोन केला. 

* हा फोन आल्यावर सतीश फड यांनी तात्काळ त्यांच्या दाजींना फोन केला. मात्र तो फोन बंद आला.
 
* त्यानंतर सतीश फड यांनी महादेव मुंडे यांच्या बँक कॉलनीतील घरी भेट दिली. मुंडे हे तुळजापूरला गेले असल्याचे सांगितले. 

* महादेव मुंडे यांचा गळा चिरलेला  होता आणि गळा कापलेला होता.

* त्याचबरोबर हातावर, गालावर, पाठीवर वार करण्यात आले होते.

* महादेव मुंडे यांचा मृतदेह सापडल्यावर त्यांचा मोबाईल, अंगठी, लॉकेट त्याचबरोबर पिग्मी  कलेक्शनचे साधारण किंमत एक ते दीड लाख रुपये हे गायब होते.

* मृतदेहाचे शवविच्छेदन करून तो मृतदेह मुंडे कुटुंबीय पोलीस ठाण्यात ठेवणार होते. मात्र, पोलिसांनी आम्ही आठ दिवसात आरोपी ताब्यात घेण्याचे आश्वासन दिल्यामुळे अंत्यविधी करण्यात आला होता.