आइपिएल २०२४ प्ले ऑफ मधून टीम मुंबई इंडियन्स बाहेर…..पहा मुंबई इंडियन्स संघाची हि मोठी बातमी.

TIMES OFF AHMEDNAGAR

मुंबईतील चाहत्यांकडून हार्दिकवर शेरेबाजी

मुंबई इंडियन्स संघ हा सध्याच्या इंडियन प्रीमियर लीगच्या (आयपीएल) खेळातील प्ले-ऑफ च्या शर्यतीतून बाहेर पडणारा पहिला संघ ठरला आहे. या खेळात मुंबईची कामगिरी फारशी चांगली राहिली नाही आणि त्याचा फटका संघाला बसला आहे. सर्वच विभागांत चमक दाखवण्यात अपयशी ठरलेल्या मुंबईच्या निराशाजनक कामगिरीची प्रमुख कारणे कोणती ? हार्दिक पंड्याच्या नेतृत्वाखाली संघ कामगिरी का उंचावू शकला नाही याचा आढावा.खेळ सुरू होण्यापूर्वी हार्दिक पंड्याला मुंबईने आपल्या संघात सहभागी करून घेत तोच संघाचे नेतृत्व करेल, याची घोषणा केली होती. रोहित शर्माला कर्णधारपदावरुन काढल्यानंतर मुंबई इंडियन्स या संघाचे चाहते नाराज झाले होते. खेळ  सुरू झाल्यानंतर मुंबईतील चाहत्यांकडून हार्दिकवर शेरेबाजीही करण्यात आली होती. कर्णधारपदापासून सुरू झालेल्या वादापासून पंड्या स्थिरावला नाही. तो कुठल्या तरी दडपणाखाली खेळताना दिसला. त्यामुळे त्याचा परिणाम हार्दिकच्या कामगिरीवर पहायला मिळाला. तो खेळाच्या सुरुवातीपासूनच अडखळत खेळताना दिसला. मुळात हार्दिकच दबावाखाली असल्यामुळे तो संघाला स्थिर ठेवू शकला नाही. फलंदाजीच्या क्रमवारीत केलेले बदल बघता हार्दिकच्या त्रस्त मानसिकतेची कल्पना येते. हार्दिकने सध्याच्या हंगामातील ११ सामन्यांत १९८ धावा केल्या तर, ११ गडी बाद केले. त्यामुळे आगामी खेळात हार्दिककडेच नेतृत्व राहील का, हे पाहणे उत्सुकतेचे असेल. मुंबईला हंगामाच्या सुरुवातीलाच तीन सामन्यांत पराभूत व्हावे लागले. यानंतर त्यांनी पुढील चारपैकी तीन सामने जिंकले आहेत. मात्र त्यानंतर सलग चार सामन्यांत त्यांना पराभवाचा सामना करावा लागल्याने संघाच्या प्ले-ऑफ मध्ये पोहोचण्याच्या शक्यता कमी झाल्या होत्या.

स्त्रोत सोशल मिडिया.

रोहित शर्माने केली संघाची निराशा… 

रोहित शर्मा वर या खेळात कर्णधारपदाचे दडपण नव्हते. त्यामुळे त्याच्याकडून चांगल्या कामगिरीची अपेक्षा होती. मात्र त्यानेही निराशा केली आहे. या खेळात रोहितने चेन्नई सुपर किंग्जविरुद्ध नाबाद १०५ धावांची खेळी केली आहे. त्याआधी त्याने रॉयल चॅलेंजर्स बंगळूरुविरुद्ध ३८ दिल्ली कॅपिटल्सविरुद्ध ४९ धावा केल्या होत्या. मग त्यान पंजाब किंग्सविरुद्ध ३६ धावांचे योगदान दिले. यानंतरच्या पाच  सामन्यांमध्ये त्याला  छाप पाडता आली नाही. त्याच्या खराब प्रदर्शनामुळे  संघाला चांगली सुरुवातही मिळत नव्हती. परिणामी संघाच्या निकालावर त्याचा परिणाम पहायला मिळाला आहे. त्याने १२ सामन्यांत ३३० धावा केल्या. पुढील महिन्यात विश्वचषक स्पर्धेला सुरुवात होणार आहे. रोहित संघाचे नेतृत्व करणार आहे. त्यामुळे उर्वरित सामन्यांमध्ये रोहितचा प्रयत्न चांगली कामगिरी करून दाखवायची असा असेल.

स्त्रोत सोशल मिडिया.

अन्य फलंदाजांनाही या खेळात पुरेशे योगदान देता आलेले नाही.

मुंबईच्या अन्य फलंदाजांनाही या खेळात पुरेशे योगदान देता आलेले नाही. १२ सामन्यांनंतरही कोणत्याही फलंदाजाला ४०० धावांचा टप्पा पार करण्यात अपयश आले आहे. मुंबईकडून तिलक वर्माने ४२.६६ च्या सरासरीने सर्वाधिक ३८४ धावा केल्या आहेत. त्याने यादरम्यान तीन अर्धशतक झळकावले. दुखापतीतून सावरल्यानंतर मुंबईच्या  संघात उशीरा सहभागी झालेल्या सूर्यकुमार यादवने आपल्या शैलीनुसार संघासाठी धावा केल्या आहेत. त्याने ९ सामन्यांत ३३४ धावा केल्या आहेत. त्यामध्ये एक शतक व तीन अर्धशतकांचा समावेश आहे. त्याने आपले शतक गेल्याच सामन्यात हैदराबादविरुद्ध झळकावले होते. इशान किशनने १२ सामन्यांत २६६ धावांची खेळी केली. मात्र, त्याला आपली कामगिरी उंचावता आली नाही. रोमारियो शेफर्ड, मोहम्मद नबी आणि टीम डेविड  यांनीही चमक दाखवली नाही. त्यातच नेहल वधेरा व नमन धीर या युवा फलंदाजांनाही छाप पाडता आली नाही.

स्त्रोत सोशल मिडिया.

एका खेळातील कामगिरीवरून हार्दिक ची उचलबांगडी होण्याची शक्यता…..

हार्दिककडून रोहितकडे पुन्हा नेतृत्वाची जबाबदारी सोपवली जावी, अशी मागणी मोठ्या संख्येने चाहते आणि काही माजी खेळाडूही करत आहेत. याची शक्यता कमी आहे. कारण इतक्या मोठ्या जबाबदारीसाठी हार्दिकला गुजरातहून मुंबईत आणले गेले, त्यामुळे केवळ एका खेळातील कामगिरीवरून त्याची उचलबांगडी होण्याची शक्यता नाही. पण हार्दिकला लवकरच आपण अष्टपैलू म्हणून खेळावे, की निव्वळ फलंदाज म्हणून संघात असावे याविषयी निर्णय घ्यावा लागेल. हे होत नाही तोवर संघाचा समतोल बिघडणार हे नक्की. कारण तंदुरुस्ती नाही आणि धारही नाही या स्थितीत हार्दिकची गोलंदाजी हा कच्चा दुवा ठरतो. वेग वाढवला की पाठदुखी बळावते. वेग कमी केला, की स्विंग आणि वैविध्य कमी असल्यामुळे गोलंदाजी महागडी ठरते. त्याऐवजी निव्वळ फलंदाजीवर लक्ष केंद्रित करणे त्याच्या आणि तो खेळत असलेल्या संघाच्या फायद्याचे ठरू शकते.