व्हिडिओ तयार करून २३ वर्षीय तरुणीने प्रेमसंबधात होणाऱ्या त्रासाला कंटाळून आत्महत्या ; आत्महत्येस प्रवृत्त केल्याप्रकरणी पोलिसाविरोधात गुन्हा….

TIMES OF NAGAR 

मुंबई : अंधेरी परिसरात २३ वर्षीय तरुणीने राहत्या घरी गळफास घेऊन आत्महत्या केली आहे. यावेळी आत्महत्येपूर्वी तरुणीने व्हिडिओ बनवला होता. तसेच तीन पानांची चिठ्ठीही लिहिली होती. प्रेमसंबधात होणाऱ्या त्रासाला कंटाळून तरूणीने आत्महत्या केल्याचे आईने तक्रारीत म्हटले आहे. त्यानुसार आत्महत्येस प्रवृत्त केल्याप्रकरणी अंबोली पोलिसांनी प्रियकराविरोधात गुन्हा दाखल केला आहे. आरोपी प्रियकर ठाणे पोलीस दलात कार्यरत आहे. मृत तरुणीच्या ५० वर्षीय आईच्या तक्रारीवरून अंबोली पोलिसांनी भारतीय न्याय संहिता कलम १०८ अंतर्गत आत्महत्येस प्रवृत्त केल्या प्रकरणी गुन्हा दाखल करण्यात आल्याची माहिती पोलिसांनी दिली. तक्रारीनुसार आरोपीने पीडित मुलीवर लैंगिक अत्याचार करून तिला दोनवेळा गर्भवती केले होते. तसेच दोन वेळा गर्भपातही केला होता. तसेच आरोपीला दारू पिण्याचे व्यसन असल्यामुळे आरोपी तिच्याकडून पैसेही घ्यायचा असा आरोप तक्रारीत करण्यात आला आहे. मुलगी दुसऱ्या धर्मातील असल्यामुळे आरोपीच्या कुटुंबाकडून लग्नाला विरोध होता असा आरोपही तक्रारीत  करण्यात आला आहे. तरूणी आई व बहिणीसह अंधेरी परिसरात राहत होती. तिची आई प्रार्थना करण्यासाठी चर्च मध्ये गेली असता तरूणीने सिलिंग फॅनला ओढणीच्या साह्याने गळफास घेऊन आत्महत्या केली. तरूणीची आई घरी आली असता मुलीने दरवाजा उघडला नाही. अखेर शेजाऱ्यांच्या मदतीने दरवाजा तोडण्यात आला. त्यावेळी मुलीने गळफास घेतला होता. ओढणी कापून तरूणीला तातडीने जुहू येथील कुपर रुग्णालयात नेण्यात आले. तेथील डॉक्टरांनी तरूणीला मृत घोषित केले.