बंडगार्डन रस्त्यावरील रुबी हाॅल क्लिनीकसमोर तरुणाला बेदम मारहाण करण्यात आल्याची घटना घडली आहे. तरुणाचा खुनाचा प्रयत्न केल्याप्रकरणी कोरेगाव पार्क पाेलिसांनी दोघांविरुद्ध गुन्हा दाखल केला आहे. सूरज सुभाष शिरोळे ,वय.२६, रा. रेल्वे क्वार्टर, मारुती मंदिराजवळ, असे गंभीर जखमी झालेल्याचे नाव आहे. याप्रकरणी अनिल रेड्डी, विपुल हिंगवले यांच्याविरुद्ध गुन्हा दाखल करण्यात आला आहे. याबाबत शिरोळे याने काेरेगाव पार्क पोलीस ठाम्यात फिर्याद दिली आहे. सूरज आणि त्याचा मित्र आकाश रविवारी दुपारी दीडच्या सुमारास बंडगार्डन रस्त्यावरुन निघाले होते. रुबी हाॅल क्लिनीकसमोर आरोपी अनिल रेड्डी आणी विपुल हिंगवले यांनी सूरज आणि त्याच्याबरोबर असलेला मित्र आकाशला अडवले. आमच्याकडे रागाने का बघतो. तुला मस्ती आली आहे का? असे आरोपी त्याला म्हणाले. त्यानंतर आरोपींनी सूरज आणि आकाशला शिवीगाळ करुन जिवे मारण्याची धमकी दिली. आरोपींनी त्यांच्याकडील लोखंडी वस्तूने सूरजला मारहाण केली. सूरजचे डोके आणि चेहऱ्यावर कठीण वस्तूने मारहाण व जीवे मारण्याचा प्रयत्न केला. त्यावेळी सूरजच्या मित्र आकाशने मध्यस्थी करण्याचा प्रयत्न केला. आरोपींनी आकाशला मारहाण केली. मारहाणीत सूरज गंभीर जखमी झाला आहे. पोलीस उपनिरीक्षक जाधव तपास करत आहेत.
