बदलापूर घटनेप्रकरणी महिला पोलीस अधिकाऱ्याचे निलंबन,एसआयटी बरखास्त…. तर अक्षय शिंदेच्या कुटुंबाने नाकारले पोलीस संरक्षण.!

बदलापूर येथील शाळेतील दोन अल्पवयीन मुलींवर झालेल्या लैंगिक अत्याचाराच्या आरोपाप्रकरणी गुन्हा दाखल करण्यास टाळाटाळ केल्यामुळे बदलापूर पोलीस ठाण्याच्या वरिष्ठ पोलीस निरीक्षकांवर खातेनिहाय चौकशीअंती निलंबनाची कारवाई करण्यात आली आहे, अशी माहिती राज्य सरकारच्यावतीने मंगळवारी उच्च न्यायालयात देण्यात आली होती. कारवाई म्हणून या महिला अधिकाऱ्याची दोन वर्षांची वेतनवाढही रोखण्यात आली आहे. याशिवाय हे प्रकरण गांभीर्याने न घेतल्याबद्दल दोन हवालदारांना समज देऊन तूर्त सोडण्यात आल्याची माहितीही सरकारी वकील हितेन वेणेगावकर यांनी न्यायमूर्ती रेवती मोहिते-डेरे आणि न्यायमूर्ती पृथ्वीराज चव्हाण यांच्या खंडपीठाला दिली आहे. त्याचप्रमाणे, या प्रकरणाच्या चौकशीसाठी स्थापन करण्यात आलेल्या विशेष तपास पथकाने (एसआयटी) तपास पूर्ण केला असून पोलीस चकमकीत ठार झालेला कथित आरोपी अक्षय शिंदे आणि प्रकरणावर पडदा टाकण्याचा प्रयत्न करणाऱ्या शाळेच्या विश्वस्तांवर आरोपपत्र दाखल केले आहे. एसआयटीची प्रकरणातील भूमिका संपल्याने ती बरखास्त करण्यात आल्याचेही सरकारी वकिलांनी न्यायालयाला सांगितले आहे.

(संग्रहित दृश्य.)