मराठी विवाहितेचा बंगळुरूत खून : पत्नीच्या रोजच्या भांडणाला वैतागून पतीने केला पत्नीचा चाकू भोकसून खून ; सुटकेस मध्ये ठेवला मृतदेह

मुंबई: बंगळुरुतील एका सॉर फ्टवेअर कंपनीत प्रोजेक्ट मॅनेजर म्हणून कामाला असणाऱ्या राकेश खेडेकर याने त्याची पत्नी गौरी सांबरेकर हिची चाकू भोसकून हत्या केल्याची धक्कादायक घटना समोर आली आहे. राकेश खेडेकर आणि गौरी सांबरेकर हे दोघेही मुंबईत राहणारे होते. दोन वर्षांपूर्वी राकेश आणि गौरीचे लग्न झाले होते. गौरी ही राकेशच्या आत्याची मुलगी आहे. या दोघांच्याही घरचे नात्यात लग्न करायला तयार नव्हते. मात्र राकेश आणि गौरी यांचे एकमेकांवर जीवापाड प्रेम होते. जवळपास चार वर्षे राकेशचे कुटुंबीय त्याला समजावत होते. मात्र राकेश आणि गौरी यांनी आम्ही लग्न करु तर एकमेकांशीच अशी ठाम भूमिका घेतली होती. त्यामुळे दोघांच्याही घरच्यांनी नाईलाजाने या लग्नाला मंजुरी दिली. मात्र या प्रेमकहाणीचा इतका भयंकर शेवट होईल याची कल्पनाही कोणीही केली नव्हती.  प्राथमिक माहितीनुसार राकेश आणि गौरी महिनाभरापूर्वीच बंगळुरुला राहायला गेले होते. गौरीने मास मिडीयाचे शिक्षण घेतले होते. तीदेखील बंगळुरुत नोकरी शोधत होती. मंगळवारी (दि.२३) रात्री राकेश आणि गौरी यांच्यात क्षुल्लक कारणावरुन भांडण झाले. त्यावेळी राकेशने संतापाच्या भरात किचनमधील चाकूने तीनवेळा गौरीच्या शरीरात खुपसला होता. त्यामुळे मोठ्याप्रमाणावर रक्तस्राव होऊन गौरीचा मृत्यू झाला. राकेशने गौरीचा मृतदेह एका सुटकेसमध्ये भरला. त्यानंतर राकेश पळून पुण्याला आला होता. राकेश खेडेकर याने गौरीचा खून केल्यानंतर मुंबईतील जोगेश्वरी परिसरात राहणाऱ्या आपल्या वडिलांना फोन केला. मंगळवारी रात्री १२ वाजता त्याने वडिलांना फोन केला होता. त्यानंतर सकाळी त्याने मला पुन्हा फोन केल्याचे वडिलांना सांगितले. तो वडिलांना म्हणाला की मी असं केलं आहे ती माझ्याशी खूप भांडत होती त्रास देत होती असे राकेशने सांगितले.