संतोष देशमुख हत्याकांड ; धनंजय मुंडेंपाठोपाठ अजित पवारांच्या राजीनाम्याची मागणी, तर मुंडेंना सहआरोपी करा,छगन भुजबळांची मागणी……

छत्रपती संभाजीनगर : अन्न व नागरी पुरवठा मंत्रीपदाचा राजीनामा दिल्यानंतर आमदार धनंजय मुंडे यांना आवादा कंपनीकडून खंडणी प्रकरणात सहआरोपी करण्यासाठीचा दबाव वाढला असून बीड पाठोपाठ बुधवार (दि.५ ) धाराशिव व जालना येथे बंद पाळण्यात आला. धनंजय मुंडे यांच्या सरकारी सातपुडा या निवासस्थानी झालेली बैठक खंडणीसाठी होती. असा आरोप आमदार सुरेश धस यांनी केला होता. विधानसभेत राष्ट्रवादी काँग्रेसच पक्षाचे (अजित पवार गट) ज्येष्ठ नेते छगन भुजबळ यांनी स्वपक्षीय सरकारला जाब विचारला. परभणीतील सोमनाथ सूर्यवंशी,जालन्याचे कैलास बोराडे तसेच लातूरमधील माऊली सोट या पीडितांना न्याय कधी मिळणार असा सवाल  छगन भुजबळ यांनी केला आहे. खंडणी प्रकरणातून सरपंच संतोष देशमुख यांची हत्या झाली असल्याचे दोषारोपपत्रात सादर करण्यात आल्याने धनंजय मुंडे यांना सहआरोपी करावे.अशी मागणी विरोधकांकडून करण्यात आली आहे. यासाठी तालुका पातळीवर रास्ता रोको तसेच टायर जाळण्याचे प्रकार झाले. जालना जिल्ह्यातील जाफराबाद तालुक्यात बंद पाळण्यात आला. संतोष देशमुख हत्या प्रकरणातील छायाचित्रे पुढे आल्यानंतर राज्यभर संतापाची लाट उसळली होती. केवळ वाल्मीक कराडच नाही तर या गुन्ह्यामध्ये धनंजय मुंडे यांना पाठीशी घातले जात आहे. अजित पवार यांना संपूर्ण प्रकरण माहीत असतानाही त्यांनी धनंजय मुंडे यांची एवढे दिवस पाठराखण केली. त्यामुळे अजित पवार यांनीही राजीनामा द्यावा. अशा प्रतिक्रियाही बंद दरम्यान काही नागरिकांनी व्यक्त केल्या आहेत. आवादा कंपनीकडून खंडणी ही निवडणूक कालावधीमध्ये मागण्यात आली. आमदार सुरेश धस व जितेंद्र आव्हाड यांनी उपस्थित केलेले प्रश्न आता जिल्हा पातळीवर कार्यकर्ते विचारू लागले आहेत. धाराशिव जिल्ह्यातील भूम, परंडा, कळंब, तुळजापूर, उमरगा या भागात शाळा, महाविद्यालये, दुकाने बंद ठेवण्यात आली होती.