मुख्यमंत्री फडणवीस पाकिस्तानच्या रडारवर ? पाकिस्तानच्या नंबरवरून हल्ला करण्याच्या धमकीचा मेसेज……

मुंबई : महाराष्ट्र राज्याचे मुख्यमंत्री देवेंद्र फडणवीस यांच्या कार्यालयावर हल्ला करण्याच्या धमकीचा मेसेज मुंबई वाहतूक पोलिसांना व्हॉट्सॲपवर मिळाला असल्याची माहिती समोर आली आहे. धमकीचा मेसेज मिळाल्यानंतर मुंबई पोलीस अलर्ट झाले असून तपास सुरू करण्यास सुरुवात झाली आहे. धमकीच्या मेसेज प्रकरणी मुंबई पोलिसांनी गुन्हा दाखल केला असल्याची माहिती प्राप्त होत आहे. तसेच धमकीचा हा मेसेज  पाकिस्तानी नंबरवरून आल्याचं सांगण्यात येत आहे. मुख्यमंत्री कार्यालयावर हल्ला करण्याची धमकी देणारा मेसेज मिळाल्यानंतर मुंबई पोलीस अलर्ट झाले आहेत. धमकीचा मेसेज करणाऱ्याचं नाव मालिक शहाबाज हुमायून राजा देव असं असल्याची प्राथमिक माहिती आहे. या धमकीच्या मेसेजनंतर गुप्तचर यंत्रणा देखील अलर्ट झालेल्या आहेत. मुंबई पोलीस सध्या या प्रकरणाचा तपास करत असून धमकीचा मेसेज पाठवणारी व्यक्ती ही नेमकं कुठली आहे ? भारतातील आहे की भारताच्या बाहेरील आहे. याचाही तपास आता मुंबई पोलीस करत आहेत. या संदर्भातील वृत्त एका वृत्त वाहिनीने दिलं आहे. दरम्यान या धमकीच्या मेसेजनंतर मुख्यमंत्री कार्यालय आणि मुंबईतील इतर संवेदनशील ठिकाणी अतिरिक्त सुरक्षा उपाययोजनाच्या पार्श्वभूमीवर महत्वाची पावलं उचलण्यात येण्याची शक्यता वर्तवली जात आहे. समोर आलेल्या माहितीनुसार, पाकिस्तानी नंबरवरून पोलिसांना हा धमकीचा मेसेज मिळाल्यामुळे यामागे काही कट आहे का ? याचाही शोध पोलिसांकडून घेतला जाणार आहे.