TIMES OF NAGAR
पुणे : गावी निघालेल्या तरुणीवर शिवशाही बसमध्ये बलात्कार करण्यात आल्याची धक्कादायक घटना पुण्यामध्ये घडली आहे. बुधवारी (दि.२६) सकाळी साडेपाचच्या सुमारास ही घटना घडली आहे. पोलिसांनी आरोपीचे नाव निष्पन्न केले असून त्याचा शोध घेण्यास पोलिसांची आठ पथके रवाना झाली आहेत. दत्तात्रय रामदास गाडे असं या प्रकरणातल्या आरोपीचं नाव आहे. ही घटना नेमकी कशी घडली हा सगळा घटनाक्रम उपायुक्त स्मार्तना पाटील यांनी माध्यमांना सांगितला आहे. पीडित मुलगी पुण्यात काम करत होती. ती सातारा या ठिकाणी तिच्या गावी चालली होती. सकाळी साधारण पावणेसहाच्या सुमारास ती बसची वाट बघत होती. त्यावेळी आरोपी तिच्याकडे गेला होता. आरोपी तिच्याशी बोलला असंही दिसतं आहे आणि त्यानंतर तिच्या शेजारचा माणूस उठून निघून गेला हे देखील दिसत आहे. आरोपीने गोड बोलून तिच्याशी ओळख करुन घेतली आणि कुठे जाते आहेस असं विचारलं त्यावर मुलीने फलटणला जायचं आहे. तर त्याने तिला सांगितलं बस इथे नाही तर दुसऱ्या ठिकाणी लागते. चल मी तुला बसजवळ घेऊन जातो. सीसीटीव्ही फुटेजमध्ये ती पिडीता आरोपीसह बसजवळ जाताना दिसत आहे. अशी माहिती स्मार्तना पाटील यांनी दिली आहे.
(संग्रहित दृश्य.)
अंधाराचा फायदा घेऊन बलात्कार ?
उपयुक्त स्मार्तना पाटील पुढे म्हणाल्या कि बसमध्ये अंधार होता, त्यावर पिडीत महिला आरोपीला म्हणाली की या बसमध्ये तर अंधार आहे. तर आरोपी तिला म्हणाला ही बस रात्री आली आहे. लोक झोपले असतील म्हणून अंधार आहे. तुला हवं तर तू चेक कर. तिला बसमध्ये जायला सांगितलं. सदर पिडीता अंधार का आहे हे बघायला बसमध्ये गेली. तेव्हा आरोपी तिच्या मागोमाग बसमध्ये घुसला त्याने बसचे दार बंद केले, त्यानंतर तिच्यावर बलात्कार केला. त्यानंतर आरोपी उतरुन गेल्याचंही सीसीटीव्ही फुटेजमध्ये दिसत आहे. तसंच पीडिता देखील उतरली आणि बसने गावी जायला निघाली होती. या दरम्यान अर्ध्या रस्त्यात गेल्यानंतर तिने हा सगळा प्रकार तिच्या मित्राला सांगितला. मित्राने तिला सांगितल्यानंतर ती आमच्याकडे म्हणजेच पोलीस ठाण्यात आली. तिच्या तक्रारीनंतर आम्ही सीसीटीव्ही फुटेज तपासलं. आरोपी हा शिरुर गावातला आहे असं कळलं आहे. त्याची ओळख पटली आहे, त्याला शोधण्यासाठी आठ पथकं रवाना झाली आहेत. डॉग स्क्वॉडही आरोपीचा शोध घेत आहे. असं स्मार्तना पाटील यांनी म्हटलं आहे. पुणे हे विद्येचे माहेरघर आहे. अनेक तालुक्यातील वाड्या-वस्त्यांमधून मुली शिकायला पुण्यात येत असतात. तसं पाहिलं तर पुण्यात मुली कायम सुरक्षित राहिल्या आहेत. पुण्यात शिकायला येणाऱ्या मुलींना सुरक्षित वाटत असतं. पण स्वारगेट येथे घडलेली घटना अत्यंत धक्कादायक आहे. अस महिला आयोगाच्या अध्यक्षा रुपाली चाकणकर यांनी म्हंटल आहे.
