दारूवरून दोन भावांमध्ये वाद ; मोठ्या भावाने लहान भावाचा थेट घेतला बळी, एैन होळीच्या दिवशी…..

बुलढाणा : दारूवरून २ भावांमध्ये झालेल्या वादाचे पर्यवसन बेदम मारहाणीत झाल्याने धाकट्या भावाचा मृत्यू झाला असल्याची प्राथमिक माहिती आहे. या प्रकरणी मोठ्या भावाला पोलिसांनी अटक केली आहे. होळी सणाच्या पार्श्वभूमीवर झालेल्या या घटनेने संग्रामपूर तालुका हादरला आहे. बुलढाणा जिल्ह्याच्या सीमावर्ती भागातील व आदिवासी बहुल संग्रामपूर तालुक्यातील खिरोडा येथे बुधवारी (दि.१२मार्च) रात्री उशिरा ही खळबळजनक घटना घडली आहे. मंगेश विठ्ठल भिवटे (राहणार खिरोडा, तालुका संग्रामपूर) असे मृत युवकाचे नाव आहे. प्राप्त माहितीनुसार मंगेश भिवटेला दारूचे व्यसन होते. तो दररोज रात्री दारू पिऊन घरी यायचा. त्यामुळे घरची मंडळी कंटाळली होती. तसेच मोठा भाऊ संदीप विठ्ठल भिवटे यालाही लहान भावाचे असे वागणे पसंत नव्हते. काल बुधवारी (दि.१२) रात्री उशिरा दारु पिऊन घरी का येतो या कारणा वरून दोघा भावांमध्ये पुन्हा कडाक्याचा वाद झाला. या वादाचे पर्यवसन हाणामारीत झाले. यावेळी मोठा भाऊ असलेल्या संदीप भिवटे याने चुल फुंकण्याची लोखंडी फुकणी व फायबरच्या फावडयाच्या दांड्याने मंगेशला हाणमार केली. यावेळी डोक्यात, तोंडावर, पाठीला जबर मार लागल्याने मंगेश गंभीर जखमी झाला होता. मंगेशच्या तोंडातून रक्त निघाले आणि तो बेशुद्ध झाला. या अत्यवस्थ स्थितीत नातेवाईकांनी उपचारासाठी रुग्णवाहिकेव्दारे शेगाव येथे हलविले. मात्र उपचार दरम्यान मंगेश मृत्यूमुखी पडला. दरम्यान वैदकीय अहवाल चौकशी अंती संग्रामपूर तालुक्यातील तामगाव पोलीस ठाण्यात आरोपी संदिप विठ्ठल भिवटे याच्या विरुध्द कलम १०३ (१) भारतीय न्याय संहिता २०२३ अन्वये गुन्हा दाखल करण्यात आला असून बुधवारी रात्री उशिरा आरोपी मोठ्या संदीप भिवटे याला तामगाव पोलीस ठाण्याच्या पथकाने अटक केली आहे. पुढील तपास तामगाव पोलीस ठाण्याचे ठाणेदार राजेन्द्र पवार करित आहेत. होळी सनाच्या तोंडावर झालेल्या या घटनेने खिरोडा गावासह संग्रामपूर तालुक्यात खळबळ उडाली आहे.