TIMES OF NAGAR
अहिल्यानगर शहरात रक्तदाब वाढवण्यासाठी वापरल्या जाणाऱ्या मेफेनटरमाइन सल्फेट या औषधाची तस्करी आणि नशेसाठी वापर होत असल्याचा गंभीर प्रकार कोतवाली पोलिसांनी उघडकीस आणला आहे. माळीवाडा परिसरातून दोन आरोपींना अटक करण्यात आली असून त्यांच्याकडून या औषधाच्या सात बाटल्या जप्त करण्यात आल्या आहेत. या प्रकरणामुळे शहरात औषधांच्या अवैध व्यापाराचे मोठे रॅकेट सक्रिय असण्याची शक्यता पोलिसांनी व्यक्त केली आहे. या प्रकरणात अटक करण्यात आलेल्या आरोपींची नावे शाहरुख अस्लम मनियार (वय २८) आणि सैजल अस्लम मनियार (वय २८) दोघेही रा. पृथ्वीराज लॉजच्या मागे माळीवाडा अशी आहेत. कोतवाली पोलिस ठाण्याचे पोलिस निरीक्षक प्रताप दराडे यांना मेफेनटरमाइन सल्फेटचा नशेसाठी गैरवापर होत असल्याची गोपनीय माहिती मिळाली होती. त्यानुसार पोलिसांनी माळीवाडा परिसरात तपास सुरू केला. तपासादरम्यान या परिसरात मेफेनटरमाइनच्या बाटल्यांची डॉक्टरांच्या परवानगीशिवाय विक्री होत असल्याचे उघड झाले. गुरुवारी ( दि. ८) पोलिसांनी आरोपींच्या घरी छापा टाकला तेव्हा त्यांच्याकडून ३० एमएलच्या मेफेनटरमाइन सल्फेटच्या सात बाटल्या जप्त करण्यात आल्या.
