आमदार जितेंद्र आव्हाडांचा संताप ; दगड घेऊन घुसले विधीमंडळ परिसरात…..

महाराष्ट्राच्या विधीमंडळाचं अर्थसंकल्पीय अधिवेशन सोमवारपासून (दि. ३) मार्चपासून  सुरू झालं आहे. या अधिवेशनासाठी सत्ताधारी व विरोधी पक्षांचे आमदार मोठ्या संख्येने विधीमंडळात दाखल झाले आहेत. दरम्यान या अधिवेशनासाठी विधीमंडळ परिसरात दाखल झालेले राष्ट्रवादी काँग्रेस पार्टी (शरदचंद्र पवार पक्षाचे) आमदार जितेंद्र आव्हाड यांनी सर्वांचं लक्ष वेधून घेतलं. कारण आमदार जितेंद्र आव्हाड एक मोठा दगड घेऊन विधीमंडळ परिसरात पोहोचले होते. आव्हाडांचा असा अवतार पाहून सर्व प्रसारमाध्यमांनी त्यांच्याकडे धाव घेतली आणि त्यांना हा दगड विधीमंडळात आणण्यामागचं कारण विचारलं. त्यावर जितेंद्र आव्हाड म्हणाले. हे आपल्या राज्यातील महायुतीच्या सरकारचं हृदय आहे. कारण याला पाझरच फुटत नाही. एकवेळ पाषाणाला पाझर फुटेल. परंतु आपल्या सरकारला पाझर फुटणार नाही. बीडचे सरपंच संतोष देशमुख यांच्या हत्या प्रकरणाला ८० दिवस उलटले तरी सरकारने अद्याप या प्रकरणी कोणतीही मोठी कारवाई केलेली नाही. या प्रकरणातील प्रमुख आरोपी वाल्मिक कराड व त्याचे साथीदार पोलिसांच्या ताब्यात असून सीआयडीने या प्रकरणी दोषारोप पत्र सादर केलं आहे. या दोषारोप पत्रातून निर्घृण हत्याकांडाशी संबंधित काही फोटो समोर आले आहेत. काळीज चिरणारे ते फोटो पाहून राज्यभरातून संतापाची लाट उसळली आहे. मात्र सरकारने याप्रकरणी कुठलंही ठोस पाऊल उचलेलं नाही. परिणामी या सरकारचा निषेध करण्यासाठी जितेंद्र आव्हाड आज विधीमंडळ परिसरात मोठा दगड घेऊन आले असल्याचे त्यांनी सांगितले.