बारमध्ये काम करणाऱ्या दोघांना झाले प्रेम,लग्नानंतरच्या वादामुळे त्याने पत्नीचे डोके सुटकेसमध्ये टाकून तर धड नाल्यात फेकले.

वसई : विरार येथे सुटकेसमध्ये आढळलेल्या महिलेच्या कवटी प्रकरणात  महिलेचे धड मांडवी पोलिसांनी मंगळवारी (दि.१८ ) नाल्यातून हस्तगत केले. सुमारे ४ तास नाल्यात शोधमोहिम चालु होती नंतर हे धड मिळाले. (दि .८) जानेवारी रोजी या महिलेच्या पतीने तिची हत्या करून धड आणि शीर वेगळे केले होते. १४ मार्च रोजी हा प्रकार समोर आला होता. नालासोपारा मधील रेहमतनगरमध्ये राहणारी उत्पला हिप्परगी (वय ५१) या महिलेची कवटी विरार फाटा येथील पिरकुंडा दर्गाजवळील झुडपात आढळली होती. मांडवी पोलीस आणि गुन्हे शाखा ३ च्या पथकाने या प्रकरणाचा तपास केला होता. घटनास्थळी आढळलेल्या एका सराफाच्या बटव्यावरून महिलेची ओळख पटविण्यात आली होती. त्यानंतर पुढील तांत्रिक तपास करून महिलेचा पती हरिष हिप्परगी (वय ४९) याला अटक करण्यात आली होती. कौटुंबिक वादातून त्याने पत्नीची हत्या केली होती. ८ जानेवारी २०२५ रोजी त्याने पत्नीची गळा दाबून हत्या केली होती. आणि नंतर  विरारच्या देशमुख फार्म जवळ नेऊन तिचे डोके कोयत्याने कापले. यानंतर तिचे घड नाल्यात फेकले तर डोके एका सुटकेसमध्ये घालून विरार फाटा येथील पिरकुंडा दर्ग्याजवळ टाकून दिले होते. या प्रकरणाचा तपास मांडवी पोलीस करत आहेत. मंगळवारी सकाळी मांडवी पोलिसांनी अग्नीशमनदलाच्या जवानांच्या मदतीने शोध मोहीम राबवली. हा नाला मोठा असल्याने धड सापडणे कठीण वाटत होते. पोलिसांनी आरोपी हरिष हिप्परगी याला देखील घटनास्थळी आणले होते. त्याने नेमकी जागा दाखवली. सुमारे ४ तासांच्या शोध मोहिमेनंतर तिचे धड आढळले. पोलिसांनी पंचनामा करून ते ताब्यात घेतले. हे धड कुजलेल्या अवस्थेत आहे आम्ही ते शवविच्छेदन करण्यासाठी पाठवले आहे. अशी माहिती मांडवी पोलीस ठाण्याचे वरिष्ठ पोलीस निरीक्षक संजय हजारे यांनी दिली आहे.